Sharaǵa otandyq jáne halyqaralyq sarapshylar qatysty.
Memleket basshysy Qasym-Jomart Toqaev jyl saıyn ótetin «Digital Bridge 2022» halyqaralyq tehnologıalyq forýmyna qatysty, dep habarlaıdy Almaty-akshamy.kz Aqordanyń baspasóz qyzmetine silteme jasap.
Is-sharaǵa Premer-Mınıstr, memlekettik organdardyń, bıznes-qurylymdardyń jetekshileri, otandyq jáne halyqaralyq sarapshylar qatysty.
Prezıdentke Astana Hub IT ekojúıesiniń qazirgi qyzmeti jáne Google for Startups kompanıasymen birlesken baǵdarlamasynyń júzege asyrylýy jóninde baıandaldy, sondaı-aq Alem baǵdarlamalaý mektebi men «Qazaqstan halqyna» qorynyń jobasy tanystyryldy.
Budan keıin Qasym-Jomart Toqaev startap aleıasyndaǵy árbir jobaǵa arnaıy toqtalyp, kompanıa ókilderiniń jetistikterin tyńdady. Olardyń birqatary tek Qazaqstan naryǵymen shektelmeı, shetel naryǵyna da shyǵa bastaǵan.
Memleket basshysyna, atap aıtqanda, aımaqtyq avıakompanıalarǵa arnalǵan Farel avıasıalyq softtyń jańa býyny, Arbuz ınternet sýpermarketi, Zypl.ai jasandy ıntellekt zaýyty, UvU Ridesharing balalar men áıelderge arnalǵan qaýipsiz tasymaldaý qyzmeti, Parqour aqyldy turaq qyzmeti, sloud-esepteýlerdi jeńildetetin FIBO Cloud qyzmeti jáne Intebix krıptobırjasy sekildi startaptar tanystyryldy.
Túrkıanyń Ónerkásip jáne tehnologıalar mınıstri Mustafa Varank pen Ózbekstannyń Aqparattyq tehnologıalar men komýnıkasıalardy damytý mınıstri Sherzod Shermatov óz elderindegi tehnoparkterdiń Qazaqstanmen aradaǵy yntymaqtastyǵyna qatysty josparlary týraly aıtyp berdi.
Sonymen qatar Memleket basshysyna Blockchair, Playrix, EPAM, inDriver halyqaralyq IT-kompanıalaryn Qazaqstanǵa tartý jáne memlekettik qyzmetterdi sıfrlandyrý nátıjeleri týraly baıandaldy. Atap aıtqanda, Astana qalasynyń geoanalıtıkalyq platformasy, E-gov densaýlyq, Áleýmettik ámıan jáne otbasynyń sıfrlyq kartasy, Vet Mobile, E-Salyq Business, Jer telimderin satý jáne jyljymaıtyn múlikpen mámilelerdi tirkeý jónindegi onlaın aýksıon sıaqty sıfrlyq sheshimder men KazNedra jer qoınaýyn paıdalanýshylardyń biryńǵaı platformasy jóninde sóz boldy.
