«Aqorda» rezıdensıasynda on tórt memlekettiń tótenshe jáne ókiletti elshileriniń Prezıdent Qasym-Jomart Toqaevqa senim gramotalaryn tapsyrý rásimi ótti.
Senim gramotalaryn Shveısarıa Konfederasıasynyń elshisi Salman Bal, Lıtva Respýblıkasynyń elshisi Egıdıýs Navıkas, Cheh Respýblıkasynyń elshisi Pavol Shepelák, Úndistan Respýblıkasynyń elshisi Nagendra Prasad, Iordanıa Hashımıt Koróldiginiń elshisi Hamza Mahmýd Iýsef Ál-Omarı, Nıderland Koróldiginiń elshisi Nıkolaas Iakob Sqermers, Qasıetti Taqtyń Qazaqstandaǵy apostoldyq nýnsıi Djordj Djordj Panamtýndıl, Slovenıa Respýblıkasynyń elshisi Dará Bavdaj Kýret, Ýganda Respýblıkasynyń elshisi Mozes Kavaalýýko Kızıge, Gana Respýblıkasynyń elshisi Leslı Acha Opoký-Ýare, Shyǵys Ýrýgvaı Respýblıkasynyń elshisi Danıel Rýben Kastılos Gomes, Efıopıa Federatıvtik Demokratıalyq Respýblıkasynyń elshisi Adem Muhammed Mahmýd, Danıa Koróldiginiń elshisi Iakob Hennıngsen, Nepal Federatıvtik Demokratıalyq Respýblıkasynyń elshisi Mılan Radj Týladhar tapsyrdy, dep habarlaıdy Almaty-akshamy.kz Aqordanyń resmı saıtyna silteme jasap.
Memleket basshysy dıplomattarǵa elimiz BUU Jarǵysynyń maqsattary men qaǵıdattaryna negizdelgen ádiletti álem ornatý tártibin jaqtaıtynyn aıtty.
«Qazaqstan eldiń qaýipsizdigi men ornyqty damýyn qamtamasyz etýge baǵyttalǵan beıbit syrtqy saıasat júrgizedi. Biz sizderdiń memleketterińizben ózara tıimdi, dostyq qarym-qatynastardy keńeıtýge jáne nyǵaıtýǵa múddelimiz», – dedi Prezıdent.
Qasym-Jomart Toqaev Qazaqstannyń ekonomıkalyq damý turǵysynan keleshegi zor ekenin, elimizdi álemdik ekonomıkanyń mańyzdy bóligine aınaldyrý úshin barlyq múmkindikti jasaıtynyn atap ótti.
«Elimiz – Ortalyq Azıa óńirindegi ekonomıkasy eń damyǵan memleket. Biraq biz munymen toqtap qalmaımyz. Ekonomıkamyzdy odan ári ornyqty damytý úshin bar kúsh-jigerimizdi jumsaımyz», – dedi Memleket basshysy.
Prezıdent saltanatty rásim sońynda elshilerdi Qazaqstandaǵy dıplomatıalyq mısıasynyń resmı túrde bastalýymen quttyqtap, ekijaqty yntymaqtastyqty odan ári nyǵaıtý isinde tabys tiledi. Qasym-Jomart Toqaev senim gramotalaryn tapsyrǵan elshiler memleketteriniń basshylaryna izgi tilegi men sálemin joldady.