Memleket basshysy Qasym-Jomart Kemeluly Toqaev Ulttyq quryltaıdyń IV otyrysynda el damýynyń strategıalyq baǵyttaryn aıqyndap, birqatar mańyzdy bastamalardy jarıalaǵan bolatyn. Endi osy bastamalardy júzege asyrýǵa arnalǵan keshendi jospar Memleket basshysynyń qol qoıýymen bekitildi.
53 tarmaqtan turatyn bul qujat – Prezıdent Ákimshiligi men Úkimettiń birlesip ázirlegen júıeli jospary. Ol tek memlekettik organdarǵa ǵana emes, búkil qoǵamǵa arnalǵan naqty baǵdar bolyp tabylady.
Atalǵan qujatta gýmanıtarlyq jáne áleýmettik-ekonomıkalyq baǵyttar qamtylyp otyr.
Gýmanıtarlyq bastamalar aıasynda:
-
«Qazaqstan balalary» atty biryńǵaı baǵdarlama ázirlenedi;
-
Jańa İshki saıasat tujyrymdamasy qabyldanady;
-
2026-2028 jyldarǵa arnalǵan nashaqorlyq pen esirtki bıznesine qarsy kúrestiń keshendi jospary daıyndalady;
-
Ulttyq sıfrlyq arhıv qurylyp, tarıhı muramyz zamanaýı formatta saqtalady;
-
Teatr ónerin damytý maqsatynda óńirlerde jańa teatrlar salynyp, ulttyq teatrlarǵa qoldaý kórsetiledi;
-
Abaı ınstıtýtynyń shetelde ashylýy – ulttyq mádenıetti halyqaralyq deńgeıde ilgeriletýdiń mańyzdy qadamy bolmaq;
-
Bıologıalyq áralýandyqty qorǵaýǵa arnalǵan halyqaralyq qor qurylady.
Al áleýmettik-ekonomıkalyq salalarda:
-
«Jaıly mektep» jobasy jalǵasyp, úsh jylda 1300 mektep jańǵyrtylady;
-
Erekshe qajettiligi bar jandarǵa arnalǵan ońaltý ortalyqtary ár oblys ortalyǵynda ashylady;
-
Óńirlerdi damytý tujyrymdamasyna jańa tásilder engiziledi;
-
Astana–Arqalyq–Torǵaı–Yrǵyz baǵytymen Transkaspıı halyqaralyq kólik dálizine shyǵatyn avtojoldar jańǵyrtylady, Arqalyqtaǵy áýejaı qaıta qalpyna keltirilip, jańa aerovokzal kesheni salynady;
-
Jyl saıyn 200-ge jýyq ınvestısıalyq jobalar júzege asady.
Budan bólek, shekara mańyndaǵy aýdandardy damytý, ǵylym qalashyqtaryn qurý, erekshe qajettilikteri bar balalarǵa keshendi qoldaý kórsetý, ÚEU men memlekettik áleýmettik tapsyrysty retteıtin zańdardy qabyldaý josparlanǵan.
Bul – Prezıdenttiń el bolashaǵy úshin usynǵan naqty qadamdarǵa negizdelgen ulttyq damý strategıasy. Barlyq saladaǵy osyndaı júıeli reformalar Qazaqstannyń uzaq merzimdi órkendeýine jol ashady.