Qazaqstan Respýblıkasy Prezıdenti laýazymyna qaıta saılaýyna oraı Qasym-Jomart Toqaevtyń atyna quttyqtaý jedelhattary kelip túsip jatyr.
BUU Bas hatshysy Antonıý Gýterrısh óz quttyqtaýynda Memleket basshysyna sáttilik tilep, Qazaqstan Birikken Ulttar Uıymy men mýltılateralızmniń aınymas ári senimdi jaqtaýshysy ekenin atap ótti, dep habarlaıdy Almaty-akshamy.kz. Akorda.kz-ke silteme jasap.
«Men ortaq múddege saı keletin máseleler jóninde, sondaı-aq Birikken Ulttar Uıymynyń Ortalyq Azıa boıynsha preventıvti dıplomatıa óńirlik ortalyǵy men uıymnyń Qazaqstandaǵy ókildik toptary arqyly tyǵyz qarym-qatynasty jalǵastyrýdy asyǵa kútemin. BUU Qazaqstannyń qaýipsizdik, turaqty damý, adam quqyǵy men genderlik teńdikti ilgeriletý salalaryndaǵy jahandyq syn-qaterlerge qarsy birlesken is-qımyldarǵa qoldaý bildirip, mindettemelerin oryndaıtynyna zor senim bildiredi», – dep jazylǵan jedelhatta.
Birikken Ulttar Uıymynyń 8-shi Bas hatshysy, Jahandyq jasyl ósý ınstıtýtynyń assambleıa Tóraǵasy Pan Gı Mýn da Qasym-Jomart Toqaevqa Qazaqstan Prezıdenti bolyp qaıta saılanýyna oraı júrekjardy tilegin joldady.
«Qazaqstannyń óńirlik mańyzy men Sizdiń kóshbasshylyq qasıetińiz Jahandyq jasyl ósý ınstıtýtynyń aımaqtyń turaqty damýyna eleýli úles qosýyna múmkindik beredi. «Jasyl» ósim perspektıvalaryn ilgeriletip, álemdik qoǵamdastyqqa klımattaǵy ózgerister salasynda kóshbasshylyq úlgisin kórsetý jáne keleshek urpaqqa ǵalamsharymyzdy taza qalpynda qaldyrý úshin Sizben birge jumys isteýge nıettimiz», – dep jazǵan Pan Gı Mýn.
Sonymen qatar Memleket basshysyna quttyqtaý jedelhattaryn Eýropalyq Keńes Prezıdenti Sharl Mıshel, Iran Islam Respýblıkasynyń Prezıdenti Ibrahım Raısı, Saýd Arabıasynyń Koroli – Qos kıeniń saqshysy Salman ben Abdýlazız Ál Saýd, Saýd Arabıasy Koroliniń Taq murageri – Mınıstrler keńesiniń tóraǵasy Muhammed ben Salman ben Abdýlazız ál Saýd, Iordanıa Koroli İİ Abdalla, Qatar Ámiri Támım ben Hamad Ál Tánı, Qatar Ámiriniń orynbasary Abdalla ben Hamad Ál Tánı, Qatar Premer-mınıstri – İshki mınıstri Haled ben Halıfa ben Abýlazız Ál-Tánı, Kýveıt ámiri Naýaf ál-Ahmad ál-Djábır ál-Sabah, Oman Sultany Haısam ben Tarıq, Palestına Prezıdenti Mahmýd Abbas, Maldıv Prezıdenti Ibragım Muhamed Solıh, Majarstan Prezıdenti Katalın Novak, Majarstan Premer-mınıstri Vıktor Orban, Polsha Prezıdenti Andjeı Dýda, Horvatıa Prezıdenti Zoran Mılanovıch, Fınlándıa Prezıdenti Saýlı Nıınıstó, Nıderland Koroli Ýılám-Aleksandr, Avstrıa Prezıdenti Aleksandr Van der Bellen, Latvıa Prezıdenti Egıls Levıts, Lıtva Prezıdenti Gıtanas Naýseda, Estonıa Prezıdenti Alar Karıs, Slovakıa Prezıdenti Zýzana Chapýtova, Slovenıa Respýblıkasynyń Prezıdenti Borýt Pahor, Bolgarıa Prezıdenti Rýmen Radev, Soltústik Makedonıa Prezıdenti Stevo Pendarovskı, Kıpr Prezıdenti Nıkos Anastasıadıs, Úndistan Premer-mınıstri Narendra Modı, Japonıa Premer-mınıstri Fýmıo Kıshıda, Koreıa Prezıdenti Iýn Sok Ól, Sıngapýr Prezıdenti Halıma Iakob, Reseı Úkimetiniń tóraǵasy Mıhaıl Mıshýstın, BUU Órkenıetter Alánsynyń Joǵary ókili Mıgel Anhel Moratınos, RF Federaldyq Jınalysy Memlekettik Dýmasynyń tóraǵasy Vácheslav Volodın, Máskeý jáne búkil Reseı Patrıarhy Kırıll, Ierýsalım Patrıarhy İİİ Feofıl, Shanhaı yntymaqtastyq uıymynyń Bas hatshysy Chjan Mın, EQYU az ulttar isi jónindegi Joǵarǵy komısary Qaırat Ábdirahmanov, Azyq-túlik qaýipsizdigi jónindegi ıslam uıymynyń Bas dırektory Erlan Baıdáýlet, TÚRKSOI Bas hatshysy Sultan Raev, Orta Azıa Katolıktik Epıskoptary Konferensıasynyń tóraǵasy, Epıskop Hose Lýıs Mýmbıela-Sıerra, Dúnıejúzilik ekonomıkalyq forýmnyń negizin qalaýshy, profesor Klaýs Shvab jáne basqalar joldady.