Prezıdent jumys saparymen Qostanaı oblysynda boldy.
Memleket basshysy Allur zaýytyna zaýytyna baryp, Kia avtomobılderiniń shaǵyn toraptyq óndirisin (CKD) iske qosty, dep habarlaıdy Almaty-akshamy.kz Aqordanyń resmı saıtyna silteme jasap.
Zaýyt basshylyǵynyń aıtýynsha, byltyr 614,2 mıllıard teńgeniń ónimi óndirildi. Ótken jyly zaýyt quny 21,5 mıllıard teńge bolatyn ónim eksporttady. Kásiporynda 2 myńnan astam adam jumys isteıdi.
Allur avtomobıl zaýytynyń jańadan iske qosylǵan jelisi Kia Sportage modeline arnalǵan. CKD – shanaqtardy dánekerleý, boıaý jáne qurastyrý jónindegi tehnologıalyq jumystardy júzege asyratyn shaǵyn torapty avtomobıl óndirisi. Ol úshin arnaıy sehtar ashylǵan. Kia óndirisiniń osy tehnologıalary Ortalyq Azıa men TMD boıynsha Qazaqstanda ǵana ornalasqan.
Prezıdent zaýytty aralaý barysynda jas jumysshylarmen áńgimelesip, olarǵa qoldaý bildirdi.
«Shyn máninde, zaýyt óte keremet eken. Taza ári óndiris mádenıeti óte joǵary. Biz jańa ǵana Kia Sportage kóligin kórdik. Bul kóliktiń sapasy óte joǵary. Sondyqtan suranys joǵary bolady dep oılaımyz. Biz keleshekte ınvestorlar shaqyryp bul zaýytty ulǵaıtamyz. Zaýyttyń bolashaǵyna baılanysty eshqandaı másele joq dep oılaımyn. Jastarǵa úlken mán berip otyrmyz. Sondyqtan bári durys bolady», – dedi Qasym-Jomart Toqaev.
Zaýyt ókilderi bıyl Kia Cerato shyǵaratyn CKD jelisin iske qosý josparlanǵanyn atap ótti. Sondyqtan kompanıa tehnıkalyq baǵyttaǵy oqý oryndarymen turaqty jumys júrgizýdi bastaǵan. Osy rette kásiporyn basshylyǵy tehnıkalyq oqý oryndarynyń stýdentteri men túlekterine arnalǵan 250 oryndyq kampýs úlgisindegi jańa zamanaýı jataqhana qurylysynyń bastalǵanyn málimdedi.