Prezıdent Beıjiń-2022 XXIV Qysqy Olımpıada oıyndarynyń qatysýshysy Abzal Ájiǵalıevti qoldap, jedelhat joldady.
Bul týraly Memleket basshysynyń baspasóz hatshysy Berik Ýálı áleýmettik jelidegi paraqshasynda jazdy, dep habarlaıdy Almaty-akshamy.kz
«Qazaqstandyqtar ózińniń Beıjiń-2022 XXIV qysqy Olımpıada oıyndarynda kórsetken ónerińdi asqan qyzyǵýshylyqpen tamashalady. Olımpıadanyń ashylý saltanatynda kók Týdy jelbiretip alyp shyqtyń. Óz jankúıerlerińniń senimin aqtap, short-trekten 500 metrge júgirýde fınaldyq básekege deıin jetip, nátıjesinde 4-oryn ıelendiń. Bul osy sport salasy boıynsha joǵary kórsetkish ekeni anyq», - delingen Memleket basshysynyń jedelhatynda.
Qasym-Jomart Toqaev sportshyǵa dúbirli dodada naǵyz erik-jiger kórsetkeni jáne jeńiske degen umtylysy úshin alǵys aıtty. Sondaı-aq onyń aldaǵy ýaqytta úlken jetistikterge jetip, otandastarymyzdy qýanta beretinine senim bildirdi.