Grekıada bolǵan poıyz apaty eldiń narazylyǵyn týdyrdy.
Grekıa Premer-Mınıstri poıyz apatynan qaza tapqandardyń týystarynan keshirim surady, dep habarlaıdy Almaty-akshamy.kz.
Taıaýda Grekıada eki poıyz bir jolǵa túsip ketip, apat bolǵan edi. 1 naýryzǵa qaraǵan túni jolaýshylar men júk poıyzynyń soqtyǵysýy saldarynan 57 adam qaza tapty. Elde osy oqıǵaǵa baılanysty narazylyqtar bastaldy.
Grekıanyń Premer-mınıstri Kırıakos Mısotakıs apattan qaza tapqandardyń týystary men jaqyndarynan keshirim surady.
«Qarama-qarsy baǵyttaǵy eki poıyz bir jolda bolmaýy kerek edi. Bul qatelikti eshkim baıqamaǵan», - dep jazdy Premer-mınıstr Feısbýktegi paraqshasynda.
Jeksenbi kúni myńdaǵan narazylyq bildirýshi Afına kóshelerine shyqty. Narazylyq bildirýshiler apat qurbandaryn eske alý úshin aspanǵa sharlar ushyrdy.