Bıllı Djın Kıng kýboginiń (komandalyq álem chempıonaty) irikteý kezeńi aıasynda Ulttyq tenıs ortalyǵynda Qazaqstan – Polsha machy ótip jatyr, dep habarlaıdy Almaty-akshamy.kz QazAqparatqa silteme jasap.
Kortqa alǵashqy bolyp Qazaqstannan álemniń 45-raketkasy Iýlıa Pýtınseva men Polsha quramasynan dúnıejúzilik reıtıńte 19-orynda turǵan Magda Lınett shyqty.
Osyǵan deıin qarsylastar ózara jeti ret kezdesip, sonyń beseýinde Magda jeńiske jetken.
Álemniń 1-raketkasy Iga Shventek Astanaǵa kele almaǵandyqtan, M.Lınettiń óz komandasynyń kóshbasshysy sanalýy zańdy edi.
Birinshi partıada polák sportshysy 4:0 esebimen alǵa ketti. Tek sodan keıin ǵana Iýlıa esepti qysqartty – 2:4. Magda esep 5:2 bolyp, setke dop bergende, óz múmkindigin paıdalana almady. Budan soń qazaqstandyq tenısshi kúsh aldy – 7:5.
Qatarynan jeti geımdi óz esebine jazǵan Iý.Pýtınseva ekinshi setti de sátti bastady – 2:0. Sodan soń taǵy bir breık jasap, 4:1-ge jetkizgenimen, Lınett sol boıda qaıta qysqartty. Degenmen Iý.Pýtınseva básekeni taǵy bir breıkpen túıindedi – 6:3.
Bir saǵat 46 mınýtqa sozylǵan kezdesý barysynda Iý.Pýtınseva 8 breık-poınttyń altaýyn paıdalandy.
Osylaısha, Qazaqstan 1:0 esebimen alǵa shyqty.
Búgin sondaı-aq Qazaqstannyń birinshi, álemniń 7-raketkasy Elena Rybakına men reıtıńte 253-satydaǵy Veronıka Falkovska sheberlik baıqasady.
Qalǵan básekeler erteń jalǵasady. Úsh jeńiske qol jetkizgen komanda álem chempıonatyna joldama alady.
