Qaraǵandy oblysynyń polıseıleri Qyzyl kitapqa engen janýarlardyń 844 múıizin tárkiledi, dep habarlaıdy Almaty-akshamy.kz
Aqpan aıynyń basynda Qaraǵandy oblysy Jańaarqa aýdanynyń qyzmetkerleri Qyzyl kitapqa engen janýarlardyń múıizin satý qylmysynyń jolyn kesý jáne aldyn alýǵa baǵyttalǵan jedel aldyn alý is-sharalaryn ótkizdi. Osy is-shara barysynda polıseılerge múıiz satýmen aınalysyp júrgen turaqty top týraly aqparat túsken.
«5 aqpan kúni Jańaarqa kentinde júrgizilgen jedel is-sharalar barysynda 29 jastaǵy azamattyń basqarýyndaǵy avtokólik toqtatyldy. Kólikke júrgizilgen tekseris barysynda 844 múıiz tárkilenip alyndy. Avtokóliktiń júrgizýshisi ýaqytsha ustaý ızolátoryna qamaldy. Qazirgi ýaqytta júrgizýshiniń eki sybaılasy anyqtalyp ustaldy», – dep habarlady Qaraǵandy oblystyq Polısıa departamentiniń bastyǵy Erlan Faızýllın.
Atalǵan fakti boıynsha Qazaqstan Respýblıkasy Qylmystyq kodeksiniń 339-1-babyna sáıkes, “Sırek kezdesetin jáne quryp ketý qaýpi tóngen, sondaı-aq, paıdalanýǵa tıym salynǵan túrlerimen, olardyń bólikterimen nemese derıvattarymen zańsyz aınalýsy” boıynsha qylmystyq is qozǵaldy. Atalǵan baptyń sanksıasyna sáıkes, múlkin tárkileı otyryp, úsh jyldan bes jylǵa deıin bas bostandyǵynan aıyrý kózdelgen.