Operasıa barysynda polıseıler elimizdegi 72 myńnan astam jalǵa alynǵan páterge tekserý júrgizdi. Bul týraly İshki ister mınıstrliginiń ókili Shuǵyla Turlybek aıtty, dep habarlaıdy almaty-akshamy.kz QazAqparatqa silteme jasap.
Qyrkúıek aıynan bastap júrgizilip kele jatqan «Ýchaske» jedel aldyn alý is-sharasy jalǵasýda. Onyń basty mindeti - qyzmet kórsetiletin ýchaskelerde máselelerdi zerdeleý, quqyq buzýshylyqtyń aldyn alý jáne eskertý. Ýchaskelik polısıa ınspektorlary turǵyndarmen tanysyp, tártip buzýshylardy anyqtaý jáne polısıa esebinde turǵandardy tekserý, sondaı-aq problemalardy sheshý úshin aýlalardy jáne páterlerdi aralap halyqpen kezdesýler ótkizedi. Jalǵa beriletin páterler, bazarlar, turmysy nashar otbasylar, azamattyq qarý ıeleri men sheteldikter tekseriledi», - dedi Shuǵyla Turlybek İshki ister mınıstrligi uıymdastyrǵan aptalyq brıfıńide.
Onyń aıtýynsha, polısıa belgili bir turǵylyqty jeri joq adamdardy, zańsyz kelgen sheteldikterdi, tyıym salynǵan zattardy saqtaý faktilerin anyqtaý maqsatynda saıajaılardy, qystaqtardy, shaǵyn eldi mekenderdi aralaıdy.
«Búgingi tańda polıseıler 4 mıllıonǵa jýyq páter men jeke úılerdi aralap, 240 myńnan astam saıajaıdy jáne 52 myńǵa jýyq sharýa qojalyǵy men qystaqtardy tekserip shyqty. 72 myńnan astam jalǵa alynǵan páterge tekserý júrgizdi. Nátıjesinde, memlekettik kiris organdarynda tirkeýsiz turǵyn úıdi jalǵa berýdiń 9 myńǵa jýyq faktisi anyqtaldy. Atys qarýyn saqtaý jáne alyp júrý erejelerin buzýdyń 2,5 myńǵa jýyq jaǵdaıy tirkeldi. Zańsyz aınalymnan tirkelmegen atys qarýynyń 277-si alyndy», - dedi ol.
Operasıa bastalǵannan beri polısıa qyzmetkerleri 388 myńnan astam ákimshilik quqyq buzýshylyqtyń, onyń ishinde 6 myń usaq buzaqylyq faktisiniń, turmysta 8 myńnan astam zań buzýshylyqtyń, 64 myńnan astam kóshi-qon zańnamasyn buzý jaǵdaıynyń jolyn kesti.