Otandyq kınogerler jyl basynan beri pıchıngke qujat ótkizý tártibin ózgertý, Saraptamalyq keńestiń quramyn qaıta qaraý jáne senarlyq komısıa qurý boıynsha máselelerdi kóterip keledi.
Osyǵan baılanysty kınogerlerdiń qatysýymen qoldanystaǵy QR «Kınematografıa týraly» zańynyń normatıvtik-quqyqtyq aktilerine ózgerister men tolyqtyrýlar engizý boıynsha jumys toby qurylǵan bolatyn, dep habarlaıdy almaty-akshamy.kz.
Ulttyq kınony qoldaý memlekettik ortalyǵynda jumys toptarynyń kezekti otyrysy ótti. Jıynǵa kınogerlerden bólek, Mádenıet jáne aqparat mınıstrliginiń Mádenıet komıtetiniń tóraıymy Kúmis Seıitova, Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalı qatysty. Mamandar mynadaı ózgerister engizýdi usyndy:
- Saraptama keńesi áýeli eń úzdik jáne qyzyqty degen senarılerdi tańdaıdy. Sodan keıin tańdalǵan kınojobalardyń tıisti qujattary jınalyp, pıchıngke qatysýǵa jiberiledi (qujattardy tapsyrǵannan keıin anyqtalǵan qatelerdi túzeýge 3 kún beriledi);
- Pıchıngke kompanıalar ár kategorıa boıynsha (kórkem, derekti jáne anımasıalyq fılmder) tek 2 joba ótkize alady;
- Memleket qarjysyn alýǵa úmitker kınojobalardy qabyldaıtyn Saraptama keńesi 15 mamannan turýy kerek. Ár kategorıanyń (kórkem, derekti jáne anımasıalyq fılmder) óz Saraptama keńesi (5 músheden) bolady. Biraq qorytyndy sheshimdi birigip shyǵarady;
- Saraptama keńesiniń quramynda kınotanýshy, kınosynshy, kınoprokat salasynyń ókilderi jáne mindetti túrde kınoóndirisine qatysy bar mamandar bolýy shart;
- Keńes músheleriniń qarjylandyrýǵa usynǵan kınojobada jumys isteýine nemese aqyly qyzmet kórsetýine quqyǵy joq;
- Pıchıng aıaqtalǵannan keıin Saraptamalyq keńestiń qorytyndysy men Vedomstvoaralyq komısıanyń usynym nátıjeleri Kınoortalyqtyń ınternet-resýrsynda birden jarıalanady.
Bul engilizýi múmkin ózgeristerdiń tek bir bóligi ǵana. Kınoortalyqtyń basqarma tóraǵasy Qurmanbek Jumaǵalıdyń aıtýynsha, buǵan deıin jumys tobynyń múshelerimen birneshe otyrys ótti. Kınogerlerden áli de kóptegen usynys túsip jatyr. Aldaǵy kúnderi onyń barlyǵy jiti qaralyp, qujat jobasyna engizilmek.
«Maqsatymyz – otandyq kınoındýstrıany damytatyn, sala mamandarynyń shyǵarmashylyǵyna esh kedergi keltirmeıtin, qazirgi zamanǵa laıyqtalǵan «ortaq ereje» qabyldaý. Eń bastysy, biz bul jumystardy kıno salasy mamandarynyń ózderimen birigip, aqyldasyp atqaryp jatyrmyz. «Kelisip pishken ton kelte bolmaıdy» degen úmittemiz», - dedi Qurmanbek Jumaǵalı.
QR «Kınematografıa týraly» zańynyń normatıvtik-quqyqtyq aktilerine ózgerister men tolyqtyrýlar engizý baǵytyndaǵy jumys toptarynyń otyrystary aldaǵy ýaqytta da ótetin bolady. Qorytyndy usynystar jınaqtalǵannan keıin Mádenıet jáne aqparat mınıstrligine joldanady.