Ózbekstan bıligi qańtar aıynda engizilgen pıaz eksportyna salynǵan tyıymdy alyp tastady, dep habarlaıdy Almaty-akshamy.kz QazAqparatqa silteme jasap.
Ózbekstan Aýyl sharýashylyǵy mınıstrligi baspasóz qyzmetiniń habarlaýynsha, 15 naýryzdan bastap pıaz eksportyna qoıylǵan ýaqytsha shekteý Úkimettiń sheshimimen alynyp tastaldy. Mundaı sheshim ishki naryqtaǵy pıaz baǵasynyń turaqtaýyna baılanysty qabyldandy.
Buǵan deıin habarlanǵandaı, Ózbekstanda baǵanyń kúrt kóterilýinen keıin 1 qańtardan bastap tórt aıǵa pıaz eksportyna tyıym salyndy.
Oǵan otyn-energetıka kesheninde, logıstıka jáne ónimdi tasymaldaý júıesinde úzilisterge ákelgen qalyptan tys sýyq sebep boldy. Ol kezde pıazdyń tabıǵı shyǵyny 228 myń tonnany qurady.