Toptyń úsh belsendisi ýaqytsha ustaý ızolátoryna qamaýǵa alyndy.
Tergeý áli aıaqtalǵan joq, dep habarlaıdy Almaty-akshamy.kz QazAqparatqa silteme jasap.
Búgin Soltústik Qazaqstan oblystyq prokýratýrasy brıfıń ótkizip, ózderin «Halyq keńesi» dep ataǵan toptyń úsh belsendisiniń qamaýǵa alynǵanyn jarıalady.
«Separatızmdi nasıhattady dep kúdiktelgen topqa eki qylmystyq is qozǵalǵan, QR Qylmystyq kodekstiń 180-baby 2-bóligi boıynsha Qazaqstan Respýblıkasynyń birtutastyǵy men tutastyǵyn ydyratýdy nasıhattaý nemese oǵan jarıa túrde buqaralyq aqparat quraldaryn jáne telebaılanys jelilerin shaqyrýmen materıaldardy taratý jáne Qylmystyq kodekstiń 179-baby boıynsha memlekettiń qaýipsizdigin ydyratýdy úgitteý boıynsha saraptalǵan. Bul aýyr qylmystar sanatyna kiredi. Onyń sanksıasymen 10 jylǵa deıingi merzimge bas bostandyǵynan aıyrý túrindegi balamasyz jazalaý qoldanylady.
Toptyń negizgi úsh fıgýranty búgin bir saǵat buryn ýaqytsha ustaý ızolátoryna qamaýǵa alyndy», - dedi SQO prokýratýrasy basqarmasynyń bastyǵy Ǵanı Jalbı.
Saıasattanýshy men basqa da mamandardyń qatysýymen bolǵan komısıalyq psıhologıalyq-fılologıalyq sot saraptamasynyń qorytyndylaryna sáıkes separatızm belgileri anyqtalǵan.
«Tergeý barysynda Petropavl qalasynda 2023 jylǵy 19 naýryzda Soltústik Qazaqstan ýnıversıtetiniń kolej ǵımaratynda «Halyq Keńesi» tobyna qatysýshylar oblys ortalyǵynyń 20 azamatynan turatyn toptyń jınalysy ótkendigi, olar ózderin Keńes Sosıalısik Respýblıkalar Odaǵynyń izbasarlary dep kózqarastaryn bildirgendikteri belgili boldy. Bireýi kámelet jasyna tolmaǵan balasymen kelgen.
Qalǵan 16 adam jumystarynan shettetilgen joq, qyzmetterin jalǵastyryp jatyr. Olar boıynsha sheshim qabyldanǵan joq.
Kinási dáleldengen jaǵdaıda jazaǵa tartylady. Tergeý barysy qatań baqylaýda. Kimniń qaıda jumys isteıtindigi týraly, qalaı bul topqa qosylǵandyǵy týraly ázirge QR Qylmystyq-prosestik kodeksiniń 201-babyna sáıkes jarıalaýǵa jatpaıdy.
Qazirgi ýaqytta tergeý áreketteri jalǵasýda jáne jınalysqa qatysqan basqa tulǵalarǵa qatysty obektıvti jáne jan-jaqty quqyqtyq baǵa beriletin bolady», - dedi Ǵanı Jalbı.
Esterińizge salaıyq, 30 naýryzda «Halyq Keńesi» tobyna qatysýshylardyń jınalysy týraly ınternet jelilerdegi beınerolık boıynsha Ulttyq qaýipsizdik Komıtetiniń SQO boıynsha Departamentimen separatızm faktisi boıynsha sotqa deıingi tergep-tekserý bastaldy. Sol kúni oblys prokýratýrasynyń nusqaýy boıynsha Ultyq qaýipsizdik Komıteti Departamentiniń, Polısıa departamentiniń, Ekonomıkalyq tergeý departamentiniń, oblystyń Sybaılas jemqorlyqqa qarsy qyzmeti qyzmetkerlerinen vedomstvoaralyq jedel-tergeý toby quryldy, prosestik prokýrorlar taǵaıyndaldy.