Mamandardyń aıtýynsha, bular - kórshi elden kelgen Sibir elikteri.
Petropavlda jabaıy elikter qaptap júr. Sońǵy kúnderi qala kóshelerinde olardy jıi baıqaýǵa bolady, dep habarlaıdy Almaty-akshamy.kz Almaty.tv-ge silteme jasap.
Áleýmettik jelige júktelgen beınekadrlardan en dala erkeleriniń qala kóshelerinde emin-erkin júrgenin baıqaýǵa bolady. Kózben kórip, uıaly telefondaryna túsirip, qyzyqtap jatqan turǵyndar olardy shahar syrtyndaǵy aınalma jol men ortalyq kóshelerde jıi kezdestiretin kórinedi.
«Aıaldamada turǵan ýaqytta júgirip kele jatqan elikti kórdim. Qolymda uıaly telefon bolyp, túsirip aldym. Shynymdy aıtsam, qala ortasynda júrgen jabaıy janýardy alǵash ret kórýim», – dedi qala turǵyny Ilá Pfaıfer.
Oblys ortalyǵynyń birneshe jerinen turǵyndardyń nazaryna ilikken jabaıy elikter adamdardan da, tehnıkadan da shoshyp, úrkimeıtin kórinedi.
«Qurbymyz ekeýmiz keshkisin ortalyq kóshede ketip bara jatyp elikti kórdik. Joldy kesip ótti. Kólikterden de, adamdardan da qoryqqan joq. Muny kórip tańqaldyq», – dedi qala turǵyny Vıktorıa Starkova.
Mamandardyń aıtýynsha, bular - kórshi elden kelgen Sibir elikteri. Byltyr ol jaqta qar qalyń túsip, aıaz kúsheıgen. Sondyqtan azyq tappaı, Qazaqstanǵa kóship kelgen.
«Reseıdiń keı oblysynda qarasha aıynyń basynda aýa raıy buzylyp, qar jaýyp, aıaz boldy. Elikterge sol kezde azyq tabý qıynǵa soqqan kórinedi. Al bizdiń oblysta aýa raıy qolaıly. Qarap otyrsańyz, jabaıy janýarlar adamdardan asa qatty úrikpeıdi. Elikterdiń bizdiń jaqtan emes ekenin birden baıqaýǵa bolady», – dedi SQO Orman sharýashylyǵy jáne janýarlar dúnıesi ınspeksıasy bóliminiń basshysy Oleg Bespalov.
Buǵan deıin janýarlar Mamlút, Qyzyljar jáne Maǵjan Jumabaev aýdanynda jıi kózge túsken. Mamandar turǵyndardy elikterdi qorqytpaýǵa shaqyrady. Al qala ishinde nemese alys jolǵa shyqqandarǵa jolda qyraǵy bolýǵa keńes beredi.