İshki ister mınıstriniń orynbasary Abaı Qaıyrbekov Perızat Qaırattyń túzeý mekemesinde qandaı qyzmetke ornalasatyny jáne ony anasy Ǵaını Alashbaevamen bir kolonıaǵa jiberý múmkindigi týraly suraqtarǵa jaýap berdi, - dep habarlaıdy Aqshamnews.kz tilshisi Tengrinews.kz-ke silteme jasap.
Perızat Qaırat qaıda jumys isteýi múmkin?
Abaı Qaıyrbekovtyń aıtýynsha, Perızat Qaırattyń eńbekke ornalastyrylýy onyń daǵdylary men qoljetimdi vakansıalarǵa baılanysty aıqyndalady.
"Ony qaı jerge ornalastyra alatynymyzdy, sáıkes bos oryndardy qaraımyz. Eger biliktiligi jetispese mundaı sottalǵandarǵa qajetti oqytý júrgiziledi", - dedi ol.
Qajet bolǵan jaǵdaıda Perızat Qaıratty túzeý mekemesi janyndaǵy kolejde nemese kýrstarda oqytý qarastyrylatynyn qosty.
Bir kolonıaǵa etaptaý múmkin be?
Vıse-mınıstrdiń túsindirýinshe, anasy men qyzyn bir kolonıaǵa etaptaý múmkin. Alaıda olardy bir bólimshede, álde ártúrli otrádta ustaý máselesin mekemeniń ózi operatıvtik jaǵdaı men qaýipsizdik talaptaryn eskere otyryp sheshedi.
"Mekeme ishinde ornalastyrý kezinde bul máseleler eskeriledi. Bir otrádta ma, álde ártúrli otrádta ma jazasyn óteıtini — operatıvtik jaǵdaıǵa baılanysty sheshiledi", - dedi ol.
Buǵan deıin ne boldy?
2024 jylǵy qarashada Perızat Qaırat tasqynnan zardap shekkenderge kómek retinde jınalǵan 1,5 mlrd teńgeden astam qarajatty jymqyrdy degen kúdikpen ustaldy. Tergeý málimetinshe, qarajattyń bir bóligi elıtalyq jyljymaıtyn múlik, kólik jáne qymbat saparlarǵa jumsalǵan. Sondaı-aq ol aqshany qolma-qol jasaý úshin tanystary men týystaryn tartty degen aqparat boldy.
Keıin Qarjy monıtorıńi agenttigi Perızat Qaırattyń taǵy bir epızod boıynsha, Palestına halqyna gýmanıtarlyq kómek retinde jınalǵan qarjyny jymqyrýǵa qatysy bolýy múmkin ekenin habarlady.
Aqyrynda Perızat Qaırat 10 jylǵa bas bostandyǵynan aıyrý jazasyna kesildi.