Bilim salasyndaǵy reformalar
Úkimet otyrysynda bilim salasynda engiziletin ózgerister jaıly aıtyldy, dep habarlaıdy Almaty-akshamy.kz
«Bolashaq pedagogterdi daıyndaý sapasyn arttyrý úshin, salalyq biliktilik sheńberin jáne «Pedagog» kásibı standartyn búgingi zaman talaptaryna saı ózgertemiz. Pán muǵalimderiniń tapshylyǵy problemalaryn sheshý úshin qaıta daıarlaý tetigin qoldanamyz. Mysaly, mamandyǵy muǵalim emes, biraq kásibı bilimi men tájirıbesi jetkilikti mamandar muǵalimdikke qaıta daıarlaý arqyly tartylady», - dedi Aımaǵambetov.
Mınıstr atap ótkendeı, Memleket basshysynyń tapsyrmasymen biliktilikti arttyrý kýrstary endi pedagogter úshin 5 jylda bir ret emes, 3 jylda bir ret ótkiziledi. Tıisti zań jobasy Parlamentte qarastyrylyp jatyr. Pedagogterdiń kýrstarynyń mazmuny da aıtarlyqtaı ózgeredi.
«Pedagogterdi jumysqa qabyldaý, atestattaý prosesterin avtomattandyrý josparlanýda, EduKyzmet biryńǵaı aqparattyq júıesinde muǵalimniń jeke kabıneti, portfolıosy ashyq túrde jınalady. Bul júıe sybaılas jemqorlyq táýekelderin joıý úshin óte mańyzdy. Sondaı-aq basshylardyń kásibı áleýeti men basqarýshylyq tájirıbesin tıimdi paıdalaný úshin dırektorlardy rotasıalaý rásimi bıylǵy jyldan bastap tolyǵymen júzege asyrylady», - dedi mınıstr.