Abaı atyndaǵy QazUPÝ bazasynda «Qazaqstan Respýblıkasynda pedagogıkalyq bilim berýdiń básekege qabilettiligin arttyrý» taqyrybynda «Pedagogıka ǵylymdary» bilim berý salasyndaǵy oqý-ádistemelik birlestiginiń keńeıtilgen májilisi ótti.
Plenarlyq jáne qatar seksıalyq májilister túrinde júrgizilgen is-sharaǵa rektor Darhan Bilálov, akademıalyq máseleler jónindegi prorektor Gúljan Jarasova, QR Ǵylym jáne joǵary bilim mınıstrliginiń jáne pedagogıkalyq baǵyttaǵy kadrlar daıarlaýdy júzege asyratyn elimizdiń elý joǵary oqý ornynyń ókilderi qatysty, dep habarlaıdy Almaty-akshamy.kz .
Darhan Bilálov óz sózinde salalyq mınıstrlik ókilderiniń qatysýymen ótken is-sharanyń mańyzdylyǵyna toqtalyp, kún tártibindegi qaralatyn máseleler elimizdiń bilim berý salasyn damytýda jáne pedagog kadrlardy daıarlaýda joǵary ról atqaratynyn atap ótti.
«Qazaqstan Respýblıkasynda bilim berýdi damytýdyń 2022-2026 jyldarǵa arnalǵan tujyrymdamasyn júzege asyrý boıynsha pedagogıkalyq mindetter júıeli jumysty talap etedi. Joǵary oqý oryndaryna bilim berý sapasyn arttyrý jáne pedagogıkalyq áleýetti nyǵaıtý boıynsha jaýapty mindetter júkteldi. Bilim berýdegi ınovasıalar, mazmundy jańartý jáne bolashaq kadrlardyń básekege qabilettiligin arttyrý – ýaqyt talaby», – dedi.
İs-shara barysynda QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń m.a. Baný Narbekova 2022-2026 jyldarǵa arnalǵan bilim berýdi damytý tujyrymdamasyn iske asyrýdaǵy ROÁK OÁB róli, bilim berý sapasyn arttyrýdyń negizgi ındıkatorlary, Tujyrymdamanyń baǵyty, orta bilim berýdiń mazmuny, tárbıe jumysy arqyly qundylyqtar júıesin qalyptastyrý týraly keńinen toqtaldy.
Plenarlyq májiliste QR bilim berýdi damytýdyń 2022-2026 jyldarǵa arnalǵan tujyrymdamasyn iske asyrý boıynsha pedagogıkalyq baǵyttaǵy OÁB mindetteri, «Pedagogıkalyq ǵylymdar» bilim berý salasyndaǵy ınovasıalyq bilim berý baǵdarlamalaryn ázirleý jáne saraptaý erekshelikteri, ulttyq biliktilik testileýindegi ózgerister men ınovasıalar (UBT) qaraldy, usynymdar berildi.
Paraleldi seksıalyq májilis moderatorlary QR ǴJBM joǵary bilim berýdi damytý Ulttyq ortalyǵynyń dırektory Aıdos Muqataev, QR ǴJBM Ulttyq testileý ortalyǵynyń dırektory Rýslan Emelbaev, QR ǴJBM Joǵary bilim berýdi damytý Ulttyq ortalyǵy joǵary bilim berý mazmunyn basqarý ofısiniń basshysy Ámına Muhambetova, Abaı atyndaǵy QazUPÝ-dyń akademıalyq máseleler jónindegi prorektory Gúljan Jarasova Bilim berý baǵdarlamalary tiziliminiń, «QR pedagogıkalyq áleýetti kúsheıtý» álemdik bank jobasy aıasynda ázirlengen 30 jańa bilim berý baǵdarlamasyn Tizilimge engizý algorıtmi, Ulttyq biliktilik testileý (UBT) jáne Normatıvtik quqyqtyq aktilerdiń (NQA) ózekti máselelerin májilis qatysýshylarymen birigip qyzý talqylady.