Qazaqstanda urlyq jasaý qylmysy boıynsha jaza qatańdatyldy
Elimizde ózgeniń múlkine qol suǵýǵa qatysty qylmystyń jazasy qatańdatyldy. Bul týraly Nur-Sultan qalasy polısıa departamenti krımınaldyq polısıa basqarmasynyń bólim basshysy Dıas Qadirov málim etti, dep habarlaıdy Almaty-akshamy.kz QazAqpatqa silteme jasap.
«Osyǵan deıin aıtqanymdaı, urlyq qylmys birneshe topqa bólinedi. Sonyń biri - páter tonaý. Páter tonaýshylar ekige bólinedi: kásibı jáne áýesqoı. Páter tonaý kóbinese kóktem men jazda bolady. Sebebi kún jyly nemese ystyq kezde úı ıeleri tereze men esikti ashyq qaldyryp jatady. Al urlyqshylar ol sátti qalt jibermeıdi. Sondaı-aq, ótken jyldyń jeltoqsan aıynan bastap tonaý men urlyqqa qatysty zańǵa ózgeris engizildi. Iaǵnı urlanǵan múlik ıesine qaıtarylyp, eki jaq tatýlasqan kúnniń ózinde qylmysker zańǵa sáıkes jazasyn óteıdi. Sol sıaqty jaza qatańdatyldy», - dedi Dıas Qadirov polısıa departamentinde ótken baspasóz máslıhatynda.
Onyń aıtýynsha, sońǵy jyldary elorda aýmaǵynda urlyq jasaý qylmysy azaıǵan.
«Osylaısha İshki ister mınıstrligi qabyldap, bizdiń departament iske asyryp jatqan sharalar nátıjesin berip jatyr. Durys baǵyttamyz degen sóz», - deıdi ol.