Almaty qalasynyń Óńirlik komýnıkasıalar qyzmetinde ótken brıfıńte «Ulttyq tutynýshylar lıgasy» respýblıkalyq qoǵamdyq birlestiginiń prezıdenti Svetlana Romanovskaıa páterdi jóndeý qyzmetin usynatyn alaıaqtardan qalaı aýlaq bolý kerektigi týraly aıtty, dep habarlaıdy Almaty-akshamy.kz.
Sarapshy alaıaqtardyń aıla-amaldarynan qorǵaný jáne páterdi jóndeýge eki ret shyǵyndalmas úshin ne isteý qajettigin aıtty. Ol úshin eń aldymen sarapshy mamandarmen keńesip, barlyq sharttardy kelisim-shartta bekitip alý qajettigi aıtylǵan.
«Kelisim jasasyp, onda oryndalýy tıis jumystardyń barlyq aýqymyn naqty kórsetý kerek. Bul, árıne, lısenzıalanǵan qyzmet túri emes. Eger jóndeý jumystaryn júrgizetin kompanıa óz materıaldaryn usynsa, onda sáıkestik sertıfıkattaryn talap etý kerek. Iaǵnı, jóndeýge paıdalanylatyn taýardyń kóshirmesi kelisim-shartqa tirkelýi kerek. Tutynýshylardyń quqyqtaryn qorǵaý qoǵamyna habarlasyp, kelisim-sharttyń úlgisin suraýdy usynamyn. Al ony toltyrǵannan keıin, oǵan qol qoımastan, zańgermen keńesińiz. Osy jaǵdaıda problemaly máseleler áldeqaıda az bolady. Al eger jóndeý jumystaryn júrgizetin kompanıa nemese jeke tulǵa bul kelisimge qol qoıýdan bas tartsa, onyń qyzmetine júginip, aqsha tóleýden aýlaq bolyńyz», - dep bólisti ol.
Sondaı-aq S. Romanovskaıa Ulttyq tutynýshylar lıgasyna jóndeý jumystaryna aldyn-ala 100 paıyz tólem jasap, al jasalǵan jumystarǵa kelgende kóńili tolmaıtyn azamattardyń kóptep júginetinin aıtty.
«Eger jóndeý jumystary ýaqytynda jasalmasa, tutynýshylardyń quqyqtaryn qorǵaý týraly zańǵa sáıkes jóndeýshiler qabyldaǵan mindettemelerdi oryndaýdy keshiktirgen árbir kún úshin 1 paıyzyn alýǵa quqyǵyńyz bar. Sondyqtan siz tólegen somanyń bir paıyzyn esepteńiz. Al eger kelisim-shartta belgilengen merzim buzylsa, jańa máselelerdiń týyndaǵanyn kútpeı, sol kúni kelisim-shartty buzýǵa quqyǵyńyz bar», - dep bólisti sarapshy.