4 qyrkúıek. UQK Shekara qyzmetiniń Almaty oblysy boıynsha departamentine qarasty Qarasaı aýdany shekara basqarmasynyń tehnıkalyq jáne kásibı daıarlyq bólimine áskerge shaqyrylǵan jas jigitterdiń alǵashqy legi keldi.
Jyldaǵy dástúr boıynsha, bólimniń bastyǵy podpolkovnık S. Áýezov bastaǵan ofıserler men serjanttar qaqpadan alǵash bolyp kirgen 40-qa jýyq bozbalany baýyrsaqpen qarsy aldy. Oblys ortalyǵy Qonaev qalasynan jetkizilgen jas sarbazdardyń júzderinen qobaljý baıqalady. Alaıda, bul ýaqytsha jaǵdaı ekeni anyq. Birneshe kúnnen soń olar áskerı ómirge úırenip, áskerdiń qatań tártibine boı úıretetini belgili. Qaqpadan engen bolashaq sarbazdardy Qýandyq Rahymnyń «Men qazaqpyn» áni qarsy alyp, olardyń Otan aldyndaǵy mindetterin eske saldy.
Áskerı kólikten túsken jas sarbazdar sapqa turǵyzylyp, aldyna shekara basqarmasy bastyǵynyń orynbasary, tehnıkalyq jáne kásibı daıarlyq bóliminiń bastyǵy podpolkovnık Saǵadat Áýezov sóz sóıledi. Ol: «Otan qorǵaý – árbir azamattyń qasterli mindeti. Búginnen bastap, sender úshin áskerı ómirdiń qarbalas kezeńi bastalady. Munda sender shekara kúzetýdiń qyr-syryn meńgeresińder», – dep, jas sarbazdardy jigerlendirdi.
Sóz kezegin shekarashy ardagerlerdiń «Zastava tarlandary» respýblıkalyq qoǵamdyq birlestiginiń Almaty qalalyq fılıalynyń belsendi múshesi, otstavkadaǵy polkovnık Qazaqbaı Ertyshbaev jalǵastyrdy:
– Qyrandarym, áskerı ómirge qosh keldińder! Osy sátten bastap, sender týǵan jerdiń tynyshtyǵyn kúzetetin sarbazdarǵa aınalasyńdar. Bul jerde senderdi tájirıbeli ofıserler áskerı ómirge úıretedi. Men de sender sekildi jas sarbaz bolyp, qolyma qarý aldym. Ómir boıy shekarany kúzetýge adal qyzmet ettim, jáne sol úshin memleket meni marapattady. «Shekarany úzdik kúzetkeni úshin» medali men «Shekara qyzmetiniń qurmetti ardageri» ataǵyna ıe boldym. Mine, búgin de sender sekildi jas sarbazdarmen kezdesip, shekara qyzmetiniń qyzyǵy men qıyndyǵy týraly aıtyp kelemin.
Úsh aıdan keıin sender de osy jerde bilim alyp, shekaraǵa attanasyńdar. Sol ýaqytqa deıin talaı ret kezdesetin bolamyz. Áskerde «Otan» degen sózdiń mán-maǵynasyn tereń túsinip, shekaraǵa barǵan soń sender múldem basqa adam bolyp shyǵasyńdar. Shekara senderdi shyńdap, ata-analaryńnyń qadirin túsinýge, Otandy qorǵaýǵa jaýapkershilikpen qaraýǵa úıretedi. Bul úshin sender áskerı tártipke baǵynyp, jaqsy oqýǵa talpynýlaryń qajet. Men senderge senemin! Qadamdaryń qutty bolsyn!
Shekara qyzmetiniń qurmetti ardageri Qazaqbaı aǵamyz jas sarbazdarǵa Paryz ben Boryshtyń, Otanǵa degen mahabbat pen adaldyqtyń qasıetti jolyn kórsetti.
– Kúzdiń alǵashqy aptasynda áskerge shaqyrylǵan jas azamattardyń alǵashqy legi keldi. Bul tek bastamasy. Aı sońyna deıin taǵy 500-deı sarbaz keledi dep kútilýde. Búgin kelgen jas sarbazdardy aldymen medısınalyq tekseris kútip tur, sodan keıin olardyń árqaısysyna arnaıy tigilip, ólshemi boıynsha áskerı forma beriledi. Biraq bul olardyń shekarashy atanǵanyn bildirmeıdi. Aldymen olar áskerı jattyǵýlardy ótip, Ant qabyldaýlary kerek. Osydan keıin ǵana el shebiniń qorǵany degen mártebeli ataqqa ıe bolyp, shynaıy qarý ustaýǵa múmkindik alady. Bul tolqynnyń qandaı bolaryn ýaqyt kórsetedi.