Parlamenttiń jańa sesıasynda jumys qarqyny budan da joǵary bolady. Bul týraly Parlament palatalarynyń birlesken otyrysynda Qazaqstan halqyna Joldaýyn jarıalaǵan Memleket basshysy Qasym-Jomart Toqaev aıtty
«Barshańyzdy kezekti sesıanyń ashylýymen quttyqtaımyn! Jaýapty qyzmetterińizge tabys tileımin! Kóktemdegi saılaýdan keıin Parlamenttegi saıası partıalardyń qatary kóbeıdi. Depýtattar quramy aıtarlyqtaı ózgerdi. Saıası partıalardyń fraksıalary, bir mandatty okrýgtan saılanǵan depýtattar da jumysqa belsene kiristi. Olar kóptegen zań jobasyna bastamashylyq etip, ózekti máselelerdi batyl kótere bastady. Depýtattarymyz jazda da kóp jumys atqardy. Nebári eki aıda 1200-den astam eldi mekendi aralap, saılaýshylarmen kezdesti, turǵyndardyń tynys-tirshiligimen tanysty. Men barshańyzǵa tabysty qyzmetterińiz úshin shynaıy rızashylyǵymdy bildiremin. Jańa sesıada jumys qarqyny budan da joǵary bolady dep oılaımyn», - dedi Prezıdent.
Memleket basshysy jyl saıyn halyqqa Joldaýyyn Parlament sesıasynyń ashylýynda jarıalaıtyndyǵyn atap ótti.
«Búginde bul jaqsy dástúrge aınaldy. Munyń aıryqsha máni bar. Sebebi dál osy sátte jáne dál osy jerde bılik tarmaqtarynyń barlyq ókilderi bas qosady. Aldaǵy orta merzimdik jumystyń baǵyt-baǵdary aıqyndalady. Naqty tapsyrmalar beriledi, jańa mindetter júkteledi. Parlament, Úkimet jáne basqa da quzyrly organdar tyń qarqynmen iske kirisedi. Bir sózben aıtsaq, memlekettik apparattyń úılesimdi ári tıimdi jumys isteýi úshin bul is-shara óte mańyzdy. Búginde meniń bastamalarymnyń basym kópshiligi júzege asty. Birqatar jumys jalǵasyp jatyr», - dedi Qasym-Jomart Toqaev.