Parıjde ashylǵan Abaı músini el Táýelsizdiginiń 30 jyldyǵyna arnaldy
Nur-Sultan qalasynyń ákimi Altaı Kólginov Instagram paraqshasynda Parıjde qazaqtyń bas aqyny Abaı Qunanbaıulynyń bústi ashylǵanyn málim etti, dep habarlaıdy Almaty-akshamy.kz.
«Parıj qalasynda qazaqtyń bas aqyny, aǵartýshy, oıshyl Abaı Qunanbaıulynyń bústi ashyldy. Búst Parıjdiń ortalyǵynda aqyndar alańynda ornatyldy, onda fransýz jazýshysy Vıktor Gúgo, orys aqyny, proza jazýshysy Aleksandr Pýshkın jáne t.b. eskertkishteri bar.
Abaı Qunanbaıulynyń músini Táýelsizdigimizdiń 30 jyldyǵy qarsańynda ashyldy. Uıymdastyrýshysy – QR Fransıadaǵy Elshiligi, búst demeýshilik qarajat esebinen ashyldy.
Memleket basshysynyń tapsyrmasy boıynsha qalamyzdyń ekonomıkasyna jeke ınvestısıalar tartý boıynsha jumys júrgizip jatyrmyz. Parıj qalasynyń meri Ann Idalgomen dostyq pen yntymaqtastyq týraly paktige qol qoıyp, birlesken jobalardy júzege asyrýdy talqyladyq. Máselen, Nur-Sultanda 30-dan astam fransýz kompanıasy jumys isteıdi. Bul birlesken mańyzdy jobalardy ashý jáne jeke ınvestısıalardy tartý ǵana emes, sol sıaqty qosymsha jumys oryndaryn qurý bolyp sanalady.
Birlesken jobalar sanyn keńeıtetin bolamyz. Sonymen birge elordamyzda Fransıanyń jeke ınvestısıalary esebinen jeke mektep salý týraly kelisimge keldik. Sondaı-aq, mýzeıler ujymyn kelesi jyly kórmelerimen shaqyrdyq, olar elordamyzdyń mádenı salasyn damytýǵa óz úlesin qosatyny sózsiz», - dep jazdy elorda ákimi.