Parıjde Rojdestvo merekesi qarsańynda tuńǵysh ret ekosyılyqtar jármeńkesi ashyldy.
Onda kóneniń kózindeı buıymdarǵa jańa ómir syılanǵan túrli áshekeıler men turmystyq zattar qoıylǵan. Bıylǵy jańa jyl parıjdikter úshin erekshe syılyqtarmen este qalmaq, dep habarlaıdy aqshamnews.kz 24.kz-ke silteme jasap.
Eldegi eń iri qaıyrymdylyq uıymdardyń biri bastama kóterip, alǵash ret qaıta óńdelgen syılyqtar jármeńkesi uıymdastyryldy. Bul bazarlyqtardy daıyndaý úshin Fransıanyń túkpir-túkpirindegi sheberler eki aı boıy tynymsyz eńbek etken.
Latıfa Lalmı, tigin atelesiniń sheberi: - Qazir Rojdestvolyq jármeńkeler maýsymy. Sondyqtan jurt jaqynyna syılyq alamyn dep biraz shyǵyndalady. Osy rette biz olarǵa qaıta óńdelgen zattyń ne ekenin aıtqymyz keldi.
Jármeńke sórelerinen túrli kádesyılardy da tabýǵa bolady. Olardyń arasynda jýrnaldardan jasalǵan oryndyqtar, Parıj Olımpıadasy kezinde stadıonnyń tóbesin japqan brezentten tigilgen sómkeler men eski jempirlerden jasalǵan oıynshyqtar bar. Osyndaı erekshe syılyqtarǵa satyp alýshylar tarapynan asqan qyzyǵýshylyq baıqalady.
Mael, satyp alýshy: - Eski buıymdarǵa jańa ómir syılaý ıdeıasy óte keremet. Sonymen qatar osy joba arqyly óńirlerdegi azamattardy jumyspen qamtý jaǵy da unady. Sondyqtan osy bir keremet ıdeıany qoldaý maqsatynda kelip turmyn.
Áleýmettik ári ekologıalyq máni bar syılyqtardy satyp alý parıjdikterdiń kóńilinen shyqty. Sondyqtan jármeńke Rojdestvo merekesi aıaqtalǵan soń da jalǵasyn tappaq.