Olımpıadaǵa daıyndyq jumystaryna arnalǵan Shtab óz jumysyn jalǵastyryp jatyr.
Kanvondaǵy (Koreıa) qysqy Jasóspirimder Olımpıadasynda Ulttyq qurama sportshylary sátti óner kórsetkennen keıin Shtab Parıjdegi jazǵy Olımpıada men Paralımpıadaǵa daıyndyqty bastady, dep habarlaıdy almaty-akshamy.kz.
QR Sport komıteti málim etkendeı, XXXIII jazǵy Olımpıa oıyndary 26 shilde men 11 tamyz aralyǵynda ótedi. Tórtjyldyqtyń basty dodasyna álemniń 205 elinen 10 myńnan astam sportshy qatysady dep josparlanǵan. Parıjdegi dodada 32 sport túrinen 329 medal jıyntyǵy sarapqa salynady.
Qazirgi tańda Qazaqstan ulttyq quramasynyń qorjynynda Parıj Olımpıadasynyń 19 lısenzıasy (sporttyń 8 túrinen) bar (sadaq atý – 4, veloshosse – 3, nysana kózdeý – 5, qazirgi bessaıys – 2, boks – 2, grek-rım kúresi – 1, erkin kúres – 1, sporttyq gımnastıka – 1). Olımpıa oıyndaryna deıin 69 lısenzıalyq jarys qaldy. Onyń ishinde 5 álem chempıonaty, 7 Azıa chempıonaty jáne 57 reıtıńtik týrnır bar.
«Bıylǵy jyldyń basty sporttyq oqıǵasy – Parıjdegi jazǵy Olımpıa oıyndary bolmaq. Shtabtyń aldaǵy maqsaty – halyqaralyq týrnırlerde sportshylardyń sátti óner kórsetýine jaǵdaı jasaý jáne múmkindiginshe kóp lısenzıa oljalaý. Qurama kóshbasshylary ár sport túriniń ereksheligi, sportshynyń qajettiligi, medısınalyq-bıologıalyq turǵyda qamtamasyz etilgeni, onyń ishinde fızıoterapıa, ońaltý men jaraqattardyń aldyn alý, psıhologıalyq qoldaý jáne jarysqa daıyndyq kezinde kúızelisti jeńý sıaqty jaǵdaılar eskerilgen jeke jospar boıynsha daıyndalady. Sonymen qatar shtab sportshylar men delegasıa múshelerin kerek-jaraqpen qamtamasyz etý máselesin qarastyryp jatyr», - dedi Olımpıadaǵa daıyndyq jónindegi shtab basshysy Elsıar Qanaǵatov.
Shtab – Memleket basshysynyń Týrızm jáne sport mınıstrligi, Ulttyq Olımpıada komıteti jáne sport federasıalary birlese jumys isteý kerek degen tapsyrmasyn oryndaý maqsatynda qurylǵan ýákiletti organ. Shtabtyń negizgi jumysy – sportshylardyń aldaǵy jarystarǵa sapaly daıyndyǵyn qamtamasyz etý. Shtab barlyq keshendi jarystar aıaqtalǵanǵa deıin turaqty negizde jumys isteıtin bolady.