Halyqaralyq nysana kózdeý federasıasy álem kýbogynyń barlyq kezeńdik jarysynan keıin olımpıadalyq reıtıńin jańartty.
Jańa reıtıń boıynsha qazaqstandyq Irına Iýnýsmetova Parıj Olımpıadasyna qatysý múmkindigine ıe boldy. Ulttyq qurama mergeni qaıta úlestirý kezeńinde 10 metrden tapanshamen nysana kózdeýde joldamaǵa qol jetkizip otyr, dep habarlaıdy almaty-akshamy.kz.
Bul – Qazaqstan quramasy sporttyq atý federasıasynyń enshisindegi 9-shy lısenzıa. Bunyń aldynda Islam Satpaev, Konstantın Malınovskıı, Aleksandra Le, Arına Altýhova, Nıkıta Chırúkın (nysana kózdeý), Ásem Orynbaı, Edýard Eshenko men Marıa Dmıtrıenko (stend atý) Parıj joldamasyn enshilegen bolatyn.
Osy qatarda Ásem Orynbaı men Irına Iýnýsmetovanyń lısenzıasy jekeleı syn boıynsha bolyp otyr.
Aıta ketetin jaıt, qazirgi ýaqytta Qazaqstan quramasynyń sportshylary ıelengen lısenzıa sany 67-ge jetti.