Qazaqstan quramasy sporttyń 25 túrinen 80 joldama jeńip aldy.
Fransıa astanasynda ótetin HHHİİİ jazǵy Olımpıada oıyndaryn bıyl alǵash ret elimizdiń bes birdeı telearnasy kórsetedi, dep habarlaıdy Almaty-akshamy.kz
Bul týraly QR Týrızm jáne sport mınıstriniń Qoǵammen baılanys jáne BAQ jónindegi keńesshisi Dıas Ahmetshárip aıtyp berdi.
«Bıylǵy, ıaǵnı Parıj-2024 Olımpıada oıyndaryn tuńǵysh ret elimizdiń bes birdeı telearnasy tikeleı efırde kórsetkeli otyr. Ol – Qazaqstan, Qazsport, «Habar», «El arna» jáne Jibek Joly telearnalary. Osy atalǵan bes arna oıynnyń resmı ashylý saltanatyn birdeı ýaqytta tikeleı efırde kórsetedi. Al oıyn bastalǵannan keıin ár arna jarysty sport túrine qaraı ártúrli ýaqytta tikeleı kórsete bastaıdy. Qaı arna qaı básekeni kórsetetinin ózara bólisip alǵan. Biraq sonyń ishinde jarystyń basym bóligin Qazsport telearnasynan tamashalaı alasyzdar. Sebebi ol – arnaıy mamandandyrylǵan sport arnasy», – dedi mınıstrdiń keńesshisi.
Sportshylar boks, dzúdo, sporttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tenıs, veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademıalyq esý, kórkem gımnastıka, trıatlon, ústel tenısi, quzǵa shyǵý jáne breıkıngten Olımpıada oıyndarynda synǵa túsedi.
Fransıa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵyna belgilengen. Oıynǵa álemniń 205 elinen 10 500 sportshy qatysady. Onda 32 sport túrinen 329 medal jıyntyǵy sarapqa salynady.