2024 jyly Parıjde ótetin Olımpıada oıyndarynyń uıymdastyrý komıteti sporttyq is-sharalarǵa bıletterdiń jappaı satylymy bastalǵanyn jarıalady.
Aksıa keshe, 17 sáýirde bastaldy, dep habarlaıdy Almaty-akshamy.kz Ulttyq olımpıada komıtetine silteme jasap.
Uıymdastyrýshylar bılet satyp alyp úlgermegen jankúıerlerge syılyq jasap, Olımpıadanyń bastalýyna 100 kún qalýyn atap ótýdi jón kórgen.
Birqatar sport túrlerinde bılet satylymy toqtatylǵan edi. Aksıa arqyly týrıser men jankúıerlerge olımpıadalyq jarystardy kórýge sońǵy múmkindik berilip otyr. Ol úshin barlyq sport túrlerine, sonyń ishinde oryndar tolyq satylyp ketken jarystarǵa 250 myń bılet satylymǵa shyǵaryldy.
Bıletterdiń eń tómengi baǵasy – 24 eýro. Uıymdastyrýshylar mundaı bıletterdiń 20 myń danasyn usynyp otyr. Qalǵandarynyń quny sport túrine baılanysty bolady jáne shamamen 1000 eýroǵa deıin barady.
Olardy áli de ınternet arqyly tek resmı bılet platformasynan satyp alýǵa bolady. Qonaqjaılyq paketteri de bar, onda bılettermen birge turǵyn úı usynylady. Jankúıerler deńgeıine baılanysty kez-kelgen ornalasatyn jerdi tańdaı alady, ártúrli ekskýrsıalar men ınteraktıvterge jazylý múmkindigi de bar.
Mundaı paketterdi satyp alǵandar úshin Clubhouse24 qoljetimdi bolady. Bul – Olımpıada ótetin orynnyń ártúrli bóliginde ornalasqan 200 arnaıy alań. Jankúıerlerge Fransıa taǵamdarymen tanysý, sportshylardyń men ártisterdiń ónerin tamashalaý, jarystardy kórý jáne t.b. usynylady.
Týrıser Parıj tynysymen tanysýy úshin úshin sanattar boıynsha arnaıy paketter jınaǵy daıyndalǵan: tarıh jáne mádenıet, tamaq pen sharap, sán jáne stıl, zamanaýı Parıj, otbasylyq, belsendi jáne saýyqtyrý demalysy.
Qonaqjaılyq paketterin On Location platformasy arqyly satyp alýǵa bolady, ol úsh-bes juldyzdy reıtıńi bar birqatar qonaqúılermen jáne toptarmen jumys isteıdi, onyń ishinde oıyndardy uıymdastyrý komıtetiniń seriktesi Accor da bar. Aıta keterligi, jıyntyqqa áýe bıletteriniń quny kirmeıdi.
Olımpıada jáne Paralımpıada oıyndaryna bıletterdiń jalpy sany 13 mıllıonnan asady.
Aıta keterligi, bıletter platformaǵa júginý kezegi boıynsha satylady. Sondyqtan úlgergińiz kelse, asyqqan jón. Bul oryndar túgel satylyp ketken sport túrlerinde bıletke qol jetkizýdiń sońǵy múmkindigi.
2024 jylǵy Olımpıada oıyndary Parıjde 26 shilde men 11 tamyz aralyǵynda ótedi.