Shymkentte átir urlaýmen aınalysqan anasy men qyzy ustaldy
Shymkentte anasy men qyzy sóredegi taýarlardy muqıat qarap júrgendeı keıip tanytyp, qymbat átirlerdi tez ári baıqatpaı sómkege salyp áketken, dep habarlaıdy almaty-akshamy.kz Polisia.kz saıtyna silteme jasap.
Ál-Farabı aýdandyq polısıa basqarmasyna qaladaǵy saýda ortalyqtarynyń birinde ornalasqan kosmetıka dúkeninen parfúmerıa urlanǵany týraly habarlama jetken.
Aryzdanýshy eki adamnyń saýda ornynan parfúmerıa ónimderin jasyryn túrde alyp ketkenin kórsetti. Sondaı-aq olar buǵan deıin de úsh ret osy dúkenge kelip urlyq jasaǵan.
Krımınaldyq polısıa qyzmetkerleri beınebaqylaý kameralarynyń jazbalaryn tekserip, qylmysqa qatysy bar adamdardy anyqtady. Olar jergilikti turǵyndar – anasy men qyzy bolyp shyqty.
Olar sóredegi taýarlardy muqıat qarap júrgendeı keıip tanytyp, qymbat átirlerdi tez ári baıqatpaı sómkege salyp, artynsha saýda núktesinen ketýge asyqqan.
Qazirgi tańda, polıseıler QR Qylmystyq kodeksiniń 188-baby ("Urlyq") boıynsha tergeý júrgizip jatyr. Tergeý amaldary aıaqtalǵan soń qylmystyq is prosesýaldyq sheshim qabyldaý úshin sotqa joldanady.