Qaza bolǵandar arasynda 630 bala men 340 áıel bar
Pákistanda maýsym aıynyń ortasynda bastalǵan mýson jańbyry men sý tasqyny saldarynan qaza tapqandardyń jalpy sany 1695 adamǵa jetti, taǵy 12865 adam jaraqat aldy. Bul týraly Pákistannyń Tabıǵı apattardy basqarý ulttyq basqarmasy (NDMA) málimdedi, dep habarlaıdy Almaty-akshamy.kz BAQ.KZ agenttigine silteme jasap.
NDMA esebine sáıkes, tabıǵı apat saldarynan qaza bolǵandar arasynda 630 bala men 340 áıel bar.
Bárinen de ońtústiktegi Sınd provınsıasy qatty zardap shekken. Onda qaza bolǵandar sany 759 adamǵa jetti. Ońtústik-batystaǵy Belýjıstan jáne soltústik-batystaǵy Haıber-Pahtýnhvada sáıkesinshe 336 jáne 307 adam qaza tapty.
Budan bólek, Pákistannyń túrli aımaqtarynda 2 045 349 úı qırap, 1 162 122 bas mal qyrylǵan.
Sý tasqynynan 84 okrýg pen 33 046 329 adam zardap shekti. Jaýyn-shashyn maýsymy bastalǵaly beri 13 myńnan astam shaqyrym jol men 440 kópir zaqymdanǵan.