Qazaqstan Premer-Mınıstriniń birinshi orynbasary Roman Sklár qatty paıdaly qazbalar men kómirsýtek shıkizatynyń ken oryndaryn tekserý máselesi jóninde keńes ótkizdi.
Úkimet jer qoınaýyn paıdalanýshylarǵa berilgen kelisimsharttar men lısenzıalardy qaıta qaraý boıynsha jumys júrgizip jatyr, dep habarlaıdy Almaty-akshamy.kz QazAqparatqa silteme jasap.
Taldaý barysynda 2022 jyly ýákiletti organdar qatty paıdaly qazbalar boıynsha 115 kelisimshart pen 198 lısenzıany, sondaı-aq kómirsýtek shıkizaty boıynsha 12 kelisimshartty buzdy.
Nátıjesinde memlekettik qorǵa altyn, kómir, temir, mys, boksıt, polımetal jáne t.b. ken oryndary qaıtaryldy, olar keıinnen strategıalyq ınvestorlarǵa berý úshin aýksıonǵa shyǵarylady.
2022 jyly ótkizilgen aýksıondardyń qorytyndysy boıynsha búdjetke 26 mlrd teńge somasyna qol qoıý bonýsy tólendi jáne kómirsýtek shıkizaty boıynsha geologıalyq barlaýǵa 50 mlrd teńgeden astam ınvestısıa málimdeldi.
Jer qoınaýyn paıdalaný quqyǵyn usynýǵa arnalǵan aýksıonǵa barlyq múddeli ınvestor qatysa alady. Aýksıondardy ótkizý týraly aqparat mindetti túrde respýblıkalyq baspa basylymdarynda jáne memlekettik organdardyń ınternet-resýrstarynda jarıalanady.
Sonymen qatar ýákiletti organdar qarjylyq mindettemelerdi buzǵan jer qoınaýyn paıdalanýshylarǵa aıyppul sanksıalaryn qoldaný boıynsha jumys júrgizip jatyr.
2022 jyly memleket kirisine qatty paıdaly qazbalar boıynsha 331 mln teńge mólsherinde turaqsyzdyq aıyby óndirildi, sondaı-aq kómirsýtek shıkizaty salasyndaǵy 9 kelisimshart boıynsha 1,8 mlrd teńgege bereshek óteldi.