Paıdalanylmaı jatqan 10 mln gektar jer memleketke qaıtarylady. Bul týraly Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy Almaty-akshamy.kz Inform.kz-ke silteme jasap.
«Jer máselesine keletin bolsaq, búgingi tańda memleketke 2,9 mln gektar paıdalanylmaıtyn jer qaıtaryldy jáne jyl sońyna deıin 5 mln gektarǵa jetkiziledi. Kelesi jyldyń sońyna deıin qosymsha taǵy 5 mln gektar paıdalanylmaıtyn jáne zańnamany buza otyryp berilgen aýyl sharýashylyǵy jerleri boıynsha naqty sheshimder qabyldanatyn bolady», - dedi Erbol Qarashókeev.
Osy rette mınıstrdiń aıtýynsha, mundaı kólemdi jumysty oryndaý úshin qosymsha 200 shtat birligin bóle otyryp, jer ınspeksıasyn nyǵaıtý kerektigine nazar aýdartty.
«Sondaı-aq aýdan ákimderi jáne jer qatynastaryna jetekshilik etetin oblys ákimdikteriniń orynbasarlary jalǵa berilgen jerlerdi anyqtaý boıynsha monıtorıńti júzege asyrý fýnksıalaryn tıisinshe oryndamaǵan jaǵdaıda, olardyń jaýapkershiligin kúsheıtý qajet dep sanaımyn», - dedi ol.