Jetisý aýdanyna qarasty №103 mektep-gımnazıasynda «Oqý úderisinde ınteraktıvti ádisterdi paıdalaný» atty qalalyq semınar ótti.
Semınardy №103 mektep-gımnazıa dırektory Aıgúl Ómirzaqova ashyp, bilim berýdegi ınovasıalyq sıfrlyq saýattylyqty zaman talabyna saı ıntegrasıalaý men ozyq pedagogıkalyq tájirıbe alańyn qurýǵa shaqyrdy. Aldymen atalmysh mektep dırektorynyń orynbasary Úmit Batyrhanova qatysýshylardy sharanyń maqsaty men baǵyty, jalpy ótkizilip otyrǵan semınardyń jumys tártibimen tanystyrdy.qala pedagogteriniń basyn qosqan jıynǵa «Órleý» Almaty qalasy boıynsha Kásibı damý ınstıtýty oqytýshylary Sandýgash Oralhanqyzy, Gúlbala Kenishtaıqyzy, Aıgúl Amanjolqyzy, Nazerke Álimbaıqyzy, Magrıpa Asqarqyzy men «Qalalyq bilim berýdegi jańa tehnologıalardyń ǵylymı-ádistemelik ortalyǵynyń» ádiskeri Kámshat Qydyrbaıqyzy qatysyp, baǵyt-baǵdar berdi.
Semınar barysynda Gúlbala Kenishtaıqyzy «RISA boıynsha deńgeılik tapsyrmalar qurastyrý» taqyryptarynda semınar-trenıng ótkizdi. «Bıylǵy jyly RISA zertteýleri Qazaqstanda ótkiziledi. Oǵan 15 jastaǵy bilim alýshylar qatysady. Bul baǵdarlamanyń ereksheligi – mektepte alǵan bilimderin qoldana otyryp, ómirlik jaǵdaıattardy sheshe alýynda. Búgingi kúnniń talaby osy. Soǵan sáıkes, oqý saýattylyǵynda RISA-nyń 6 deńgeıli tapsyrmalaryn oryndaı alyp, ashyq derekkózderden alynǵan aqparatty taldaı bilýi tıis. Bul mátindi durys tańdaý, oqý saýattylyǵyna mán berý, tapsyrmany durys bere bilý» dep tujyrymdady.
Sonymen qatar, pedagogter praktıkalyq jumys barysynda ınteraktıvti oqytýdyń ártúrli quraldaryn saralap, sabaq mazmunyn sıfrlyq platformalar negizinde qurýdy jáne aqparattyń sapasyn baǵalaýdy, aqparattyń senimdiligin anyqtaýdy, RISA boıynsha deńgeılik tapsyrmalar qurýdy úırendi.
Semınar barysynda ınteraktıvti ádister men sıfrlyq quraldardy oqý úderisine tıimdi engizý joldary qarastyrylyp, №103 mektep-gımnazıa pedagogteri pán muǵalimderiniń sıfrlyq daǵdylaryn damytýǵa baǵyttalǵan sheberlik sabaqtaryn ótkizdi.
Semınarǵa qatysýshylar keri baılanys jasap, qajetti platformalarmen jumys jasaýǵa, zamanaýı bilim berý ádistemelerin jınaqtaýǵa jáne jańa tehnologıalar boıynsha praktıkalyq tájirıbe almasýǵa keńinen múmkindikter jasaǵan mektep ákimshiligine rızashylyqtaryn bildirdi.
Semınar jumysyn «Kásibı damý ınstıtýtynyń» aǵa oqytýshysy Sandýǵash Oralhanqyzy «Aqparattyq jáne medıasaýattylyq – bul qazirgi zamandaǵy aqparatty tıimdi tabý, taldaý, paıdalaný jáne qurýdaǵy mańyzdy qabileti bolyp tabylady. Pedagogter oqýshylarǵa aqparattyń sapaly jáne shynaıylyǵyn anyqtaýdy, durys paıdalanýdy jáne aqparattyq qaýipterden qorǵanýdy úıretýi kerek. Aqparattyq jáne medıasaýattylyq bilim berý prosesin jetildirýge, oqýshylardyń jańa bilimderdi alý jáne synı oılaý qabiletterin damytýǵa kómektesedi. Qazirgi zamanǵy tehnologıalardyń damýy ártúrli aqparat kózderin keńinen paıdalanýdy talap etedi. Aqparatty durys qoldaný shyǵarmashylyq qabiletterdi arttyryp, kásibı deńgeıde ósýge yqpal etedi. Bul jerde aqparattyq saýattylyq kómekke keledi. Sondyqtan da, kez-kelgen aqparatty durys, saýatty paıdalaný, aqparatty jınaqtaýǵa, taldaýǵa jáne usynýǵa arnalǵan qajetti daǵdylar qazirgi pedagogterimizde bolý kerek»- degen sózimen túıindedi.