Túrkistan oblysy boıynsha «Qazsýshar» fılıaly sýarý maýsymy bastalǵaly sharýalarǵa 2,23 mlrd tekshe metr sý berdi.
Búgingi tańda Táýelsizdiktiń 20 jyldyǵy atyndaǵy kanaldan qosymsha sekýndyna 10 tekshe metr sý berilip jatyr. Mashınalyq kanal sharýalardyń suranysyna saı «Dostyq» kanalyna sý tastaıdy. Osylaısha, Jetisaı jáne Maqtaaral aýdandarynyń 86 myń gektar egis alqabyn sýarmaly sýmen qamtamasyz etedi, dep habarlaıdy aqshamnews.kz
«Bıyl sharýalardan suranys kóp emes. Sebebi, Ózbekstannan «Dostyq» kanaly arqyly turaqty sý kelip jatyr. Salystyrmaly túrde aıtsaq, ótken jyly dál osy ýaqytta biz 5 sý sorǵysyn qosatyn edik. Qazir 2 sý sorǵysy jumys istep tur»,- dedi kanal gıdrotehnıgi Berik Myńbaev.
Eske salsaq, 1 sáýirden beri ózbek tarapy elimizge Syrdarıa ózeni arqyly 4 mlrd tekshe metrden astam sý jiberdi. Osyǵan deıin Sý resýrstary jáne ırrıgasıa mınıstri Nurjan Nurjigitov Ózbekstanmen jarty jyl ishinde Qazaqstanǵa Syrdarıa ózeni arqyly 3,7 mlrd tekshe metr sý jiberý týraly mámilege kelgen bolatyn. Bul jumystardyń barlyǵy elimizdiń ońtústik óńirlerindegi sharýalardyń sýarmaly sýǵa suranysyn tolyq qanaǵattandyrý úshin jasalyp jatyr.