Saılaýshylardyń 33,54%-y daýys bergen.
Ózbekstannyń ortalyq saılaý komısıasy eldegi kezekten tys prezıdenttik saılaýdy ótti dep tanydy, dep habarlaıdy Almaty-akshamy.kz
Quzyrly vedomstvonyń málimetinshe, jergilikti ýaqyt 11:00-degi (Astana ýaqyty boıynsha 12:00) jaǵdaı boıynsha respýblıka prezıdentiniń kezekten tys saılaýynda saılaýshylardyń 33,54%-y daýys bergen. Ózbekstan zańnamasyna sáıkes, jalpy saılaýshylardyń 33% shegi ıgerilgende saılaý ótti dep sanalady.
Ózbekstannyń OSK derekteri boıynsha, saılaýshylar tizimine 19 mln 593 myń 838 azamat engizildi, 14 okrýgtik saılaý komısıasy, 10 784 saılaý ýchaskesi quryldy. Shetelde júrgen ózbekstandyqtar úshin 39 elde 56 saılaý ýchaskesi ashyldy. Qazaqstan terıtorıasynda, atap aıtqanda Astana, Almaty jáne Aqtaý qalalaryndaǵy Ózbekstannyń dıplomatıalyq ókildikterinde saılaý ýchaskeleri ashyldy.
Ýchaskeler jergilikti ýaqyt boıynsha saǵat 20-00-de jabylady. Daýys berý qorytyndysy dúısenbi kúni tańerteń jarıalanady dep josparlanǵan.
Tórt adam prezıdenttikten úmitker. Ekologıalyq partıa óz kóshbasshysy Abdýshýkýr Hamzaevty, Halyqtyq-demokratıalyq partıa óz kóshbasshy Ulyqbek Inoıatovty, "Adolat" sosıal-demokratıalyq partıasy - Joǵarǵy Sot tóraǵasynyń burynǵy birinshi orynbasary Robahon Mahmýdovty, al "Uzlıdep" basqarýshy partıasy - qazirgi prezıdent Shavkat Mırzıóevti usyndy.