Tarıhı muranyń quny 2,5 mlrd ózbek somy
Ózbekstannyń Fergana oblysyndaǵy Tarıh jáne mádenıet murajaıynda teńdessiz 70 eksponattyń jalǵan jádigerlermen almastyrylǵany anyqtaldy. Tarıhı muranyń quny 2,5 mlrd ózbek somy nemese 230 myń dollarǵa baǵalanyp otyr, dep habarlaıdy Almaty-akshamy.kz QazAqparat-qa silteme jasap.
«Arnaıy jumys toby murajaı qoryn zertteý barysynda quny 2,5 mlrd ózbek somyn quraıtyn teńdessiz 70 eksponattyń (56-sy beıneleý óneriniń týyndylary) jalǵan ekenin anyqtady. Sonymen qatar murajaıda turýy tıis 1 beıneleý óneriniń týyndysy men 1 grafıkalyq shyǵarma joq bolyp shyqty»,-delingen vedomstvonyń habarlamasynda.
Aıta keterligi, 2011 jyly Fergana oblysynyń İshki ister basqarmasyna 21 eksponat tapsyrǵan. 2016 jáne 2020 jyldar aralyǵynda olardyń tek 14-i ǵana qaıtarylǵan. Qazirgi tańda Fergana oblysynyń İshki ister basqarmasynda mundaı qundylyqtardyń joq ekeni anyqtalyp otyr.
Agenttik ókilderi sondaı-aq tekserý barysynda murajaıdy kúrdeli jóndeýge bólingen 3,1 mlrd ózbek somynyń 1,4 mlrd somy urlanǵany anyqtalǵanyn habarlady.
Atalǵan derekter boıynsha qylmystyq is qozǵalyp, tergeý júrip jatyr.
Buǵan deıin Ózbekstan murajaılarynan 30 jylda 3 myńnan astam teńdessiz mádenı qundylyqtar joǵalǵany habarlanǵan bolatyn. Keltirilgen shyǵyn kólemi 4 trln som nemese 357 mln dollardy quraıdy.
Murajaıdan urlanǵan qundylyqtardyń osynshama zor kólemde ekenin eskere otyryp, Ózbekstan prezıdenti Bas prokýratýra, Týrızm jáne mádenı mura mınıstrligi basshylyq etetin komısıaǵa Ózbekstan murajaılaryndaǵy jádigerlerdiń barlyǵyn túgendep, jyl sońyna deıin olardyń elektrondy bazasyn jasaýdy tapsyrdy.