Qazaq ulttyq qyzdar pedagogıkalyq ýnıversıtetinde Almaty qalasy Bilim basqarmasynyń qoldaýymen «Sabaqty zertteý arqyly oqý men oqytýdy damytý» taqyrybynda II jyl saıynǵy qalalyq ǵylymı-praktıkalyq konferensıa ótti. İs-shara Lesson Study tásilin bilim berý tájirıbesine engizýdiń ózekti máselelerin talqylap, pedagogter men bolashaq muǵalimder úshin tájirıbe almasýǵa baǵyttaldy.
Aýqymdy konferensıaǵa 300-den astam qatysýshy – jetekshi ǵalymdar, tájirıbeli ustazdar, mektep basshylary jáne pedagogıkalyq baǵyttaǵy stýdentter jınaldy.
Lesson Study – muǵalimderdiń kásibı sheberligin jetildirýge baǵyttalǵan tásil. Ol oqytý prosesiniń sapasyn arttyryp qana qoımaı, muǵalimderdiń pándik bilimi men pedagogıkalyq sheberligin tereńdetýge múmkindik beredi.
Konferensıanyń negizgi maqsaty – Lesson Study tájirıbesimen bólisý, qol jetkizilgen nátıjelerdi saralaý jáne osy tásildi bilim berý uıymdarynda qoldanýdyń bolashaǵyn baǵamdaý.
İs-sharanyń ashylýynda quttyqtaý sóz sóılegen Almaty qalasy Bilim basqarmasyna qarasty Bilim berýdegi jańa tehnologıalar ǵylymı-ádistemelik ortalyǵynyń dırektory Dáýren Saǵynǵalıev pen Almaty qalasy Jetisý aýdanynyń ákimi Lázzat Jylqybaeva bilim salasyndaǵy jańashyl bastamalardyń mańyzdylyǵyn atap ótti. Sonymen qatar Almaty qalasy Naýryzbaı aýdany «S. Kópbaev atyndaǵy №186 JBBM» KMM dırektory Gúljazıra Raeva jáne pedagog-trener, USTART negizin qalaýshy Eskendir Bestaı baıandama jasady.
Kezdesý aıasynda plenarlyq otyrystar, pikirtalas panelderi jáne posterlik sesıalar uıymdastyryldy. Bul alańda stýdentter men tájirıbeli pedagogter ózderiniń Lesson Study jobalaryn tanystyryp, naqty nátıjelerimen bólisti.
Konferensıanyń resmı ashylýynda Qazaq ulttyq qyzdar pedagogıkalyq ýnıversıtetiniń Basqarma Tóraǵasy – Rektory Gúlmıra Qanaı «Óz tájirıbesin zertteý arqyly túbinde álemdi ózgertetin – ustaz» taqyrybynda baıandama jasady:
«Ýnıversıtetimizde úshinshi jyl qatarynan stýdentter dástúrli dıplom jumysynyń ornyna Lesson Study jobalaryn usynýda. Bul – olardyń zertteýshilik jáne praktıkalyq qabiletterin damytýǵa múmkindik beredi. Búgingi konferensıa aıasynda stýdentter men Almaty oblysynyń pedagogteri óz zertteý sabaqtarynyń nátıjelerin ortaǵa salyp otyr. Bul – kásibı damýdyń mańyzdy qadamy», – dedi rektor.
Konferensıa aıasyndaǵy strategıalyq sesıa barysynda jekemenshik mektepter men bilim berý ortalyqtarynyń basshylary da sóz alyp, Lesson Study tásilin óz tájirıbelerinde qalaı qoldanyp jatqanyn aıtty. «Jańa urpaq mektebi NGS» HR-dırektory Kım Irına Evgenevna ýnıversıtetpen tyǵyz áriptestiktiń naqty nátıjeler berip jatqanyn atap ótti:
«Qazaq ulttyq qyzdar pedagogıkalyq ýnıversıtetinen kelgen stýdentter – óz isiniń naǵyz mamandary. Biz osy seriktestikti ári qaraı damytyp, bolashaq ustazdarǵa tájirıbe alańy bolýǵa daıynbyz».
Konferensıaǵa qatysýshylar is-sharanyń joǵary deńgeıde uıymdastyrylǵanyn jáne usynylǵan materıaldardyń kásibı qyzmetterinde paıdaly bolatynyn erekshe atap ótti. Lesson Study ádisi bilim berýdi jetildirýge baǵyttalǵan ǵylymı-zertteý men praktıkany biriktiretin mańyzdy qural retinde tanylyp otyr. Bul bastama – zertteýshi pedagogter qaýymdastyǵyn damytý jolyndaǵy taǵy bir mańyzdy qadam.