Búgin 18 tamyz - elimizde shekarashylar kúni. Iaǵnı, shekarashylardyń kásibı merekesi. Osy kúni 1992 jyly Elbasynyń Jarlyǵymen elimizde Shyǵys shekaralyq okrýginiń bazasynda Shekara áskerleri qurylǵan bolatyn, dep habarlaıdy Almaty-akshamy.kz.
Osylaısha bıyl QR UQK Shekara qyzmetiniń qurylǵanyna tabany kúrekteı 31 jyl tolyp otyr. Sodan beri ózine júktelgen jaýapty mindetti abyroıly atqaryp júrgen shekarashylar óz qyzmetterine min túsirgen emes.
Dástúr boıynsha, atalmysh merekeni QR UQK Shekara akademıasynyń jeke quramy oqýǵa endi ǵana túsken kýrsanttarǵa áskerı ant qabyldaý rásiminen bastady. Bul joly bıyl ǵana Reseı Federasıasynyń áskerı joǵary oqý oryndaryna joldama alǵan 30-dan astam kýrsant Otan aldynda áskerı ant qabyldady. Shekarashylar kúnine tuspa-tus kelgen merekege bolashaq shekarashy ofıserlerdiń ata-analary men týǵan-týystary qatysty.
Saltanatty rásimde akademıa bastyǵynyń mindetin ýaqytsha atqarýshy polkovnık A.Ismaılov: «Qaıyrly kún, qurmetti ofıserler jáne áriptester men kýrsanttar! Búgin akademıanyń plasynda turǵan birinshi kýrs kýrsanttarynyń ómirindegi jarqyn jáne umytylmas kún. Sizder búgin Otan aldynda áskerı ant berdińizder. Reseı Federasıasy men Túrkıa Respýblıkasynyń joǵary áskerı oqý oryndarynda oqyǵan jyldaryńyzben ótkizgen altyndaı ýaqyttaryńyz sizder úshin elimizdiń bet-beınesi ǵana bolyp qana qoımaı, tabysty kásibı qyzmetińizdiń kepili bolatynyna senimdimin. Áskerı ant - bul jaı ǵana resmı is-shara emes, antqa ómir boıy adal bolýǵa berilgen sert. Búginnen bastap ómirlerińizde jańa kezeń bastalady. Aıtyp otyrǵan antyńyz sizderge úlken jaýapkershilik júkteıdi, janyńyzdy aıamaı Otandy qorǵaýǵa mindetteıdi. Shekara asyp shetelde oqý, bilim alý sizge úlken jaýapkershilik bolyp tabylady. Óıtkeni, sizder sheteldegi elimizdiń ókilisizder. Siz ózińizdiń kásibı qyzmetińizge qajetti bilim men jaqsy daǵdylardy alasyz dep úmittenemin», - dedi.
Al ata-analar atynan sóz alǵan kýrsant A.Ahmýllaevtyń anasy A.Abdrammova analyq aqyl keńesin aıtyp, sáti túsip oqýǵa attanaıyn dep otyrǵan barsha kýrsanttardyń aldaǵy qyzmetine sáttilik tiledi.
Óz kezeginde kýrsanttar atynan sóz alǵan M.Nurbolat barsha qarýlastaryn Otan aldynda bergen áskerı antqa adal bolýǵa shaqyrdy. Áskerı anttyń azamatqa bir aq ret qana beriletin qaıtalanbas mańyzdylyǵyna toqtaldy.
Bul jyly Reseı Federasıasynyń áskerı oqý oryndarynan bólek, tuńǵysh ret Túrkıa Respýblıkasyna 6 kýrsant attanǵaly otyr. Olar Stambýldyń áskerı teńiz akademıasyna jáne Ankara qalasyndaǵy «Kara Harp Okýlý» qurlyq áskerleriniń áskerı ýchılıshesine barady. Bul jyly oqýǵa túsken qazaqstandyq shekarashylardyń arasynda qyzdar joq eken. Áıtpese, jyl saıyn joq degen de bir boıjetken Reseıdiń Sankt- Peterbýrg qalasynda ornalasqan áskerı medısına akademıasyna attanatyn.