Almatyda bes kúnde 30-dan astam kúrdeli «zergerlik» ota jasaldy
Almaty tórinde ornalasqan Kardıologıa jáne ishki aýrýlar ǴZI-da otandyq arıtmologtar reseılik profesor, RǴA akademıgi Sergeı Artemenkonyń jetekshiligimen 5 kún ishinde 30-dan astam kúrdeli «zergerlik» operasıa jasady, dep habarlaıdy almaty-akshamy.kz. Bul otalar óte kúrdeli jáne júrek yrǵaǵynyń buzylýyn emdeýdiń eń tıimdi ádisi sanalady.
«Biz alys jáne jaqyn shetelderdiń kóptegen medısınalyq ortalyqtarymen jáne klınıkalarymen yntymaqtastyqtamyz. Jetekshi reseılik mamanmen birlesken operasıalar júrgize otyryp, ǴZI dárigerleri úlken tájirıbe alýda. Sergeı Nıkolaevıch júrekshe fıbrıllásıasy bar emdelýshilerde radıojıilikti kateterlik ablásıa prosedýrasynyń tıimdiligin arttyrýǵa múmkindik beretin ádisnamalyq tásilderdi ázirledi. Bul ádister halyqaralyq jáne ulttyq klınıkalyq usynystarǵa engizildi. Profesor Artemenkoǵa operasıalardy kásibı qoldaǵany úshin alǵysymdy bildirgim keledi», – deıdi ınstıtýttyń basqarma tóraǵasy Marat Pashımov.
Radıojıilik kateterlik ablásıa júrekke eń kúrdeli joǵary tehnologıalyq operasıalardy jasaýǵa múmkindik beretin úsh ólshemdi navıgasıalyq kartaǵa túsirýdiń ozyq júıelerin paıdalana otyryp júrgiziledi. Osylaısha adamdardyń ómirin qutqarady, olardy tolyqqandy ómirge qaıtarady. Bul júıe Almatyda tek Kardıologıa jáne ishki aýrýlar ǴZI-da ǵana bar.
Aptanyń sońyna deıin júreksheler fıbrıllásıasy jáne basqa da kúrdeli ektopıkalyq oshaqtary bar naýqastarǵa ota jasalady. Elimizdiń basqa klınıkalarynda birneshe ret qaıtalap ota jasalǵan naýqastar bar.
Mysal keltirsek, kúrdeli arıtmıamen 63 jáne 54 jasta 2 naýqasqa operasıa jasaldy. Olardyń ekeýi de qozǵalmasa da júreginiń jıi soǵatynyn, fızıkalyq júkteme kezinde entigetinin, denesin únemi álsizdik jaılap alǵanyn aıtqan. Másele mynada, arıtmıanyń patologıalyq oshaqtary júrektiń ótkizgish júıesinde onymen «qaýipti» jaqyndyqta ornalasqan. Personaldyń joǵary biliktiliginiń, zamanaýı tehnologıalyq jabdyqtyń jáne pasıentterdi tıisti daıarlaýdyń arqasynda operasıalar sátti ótti.
Profesordyń aıtýynsha, 3D tehnologıalary arıtmıanyń kózin – júrektiń basqa tinderine zaqym keltirmesten patologıalyq oshaqty 1 mıllımetrge deıin tabýǵa kómektesedi. Naýqas tolyǵymen qalpyna keledi, nátıje operasıa kezinde kórinedi.
Bul – is júzinde «zergerlik» jumys. Yrǵaqtyń buzylýyn dıagnostıkalaýdyń dáldigin arttyrý arqyly emdeýdiń tıimdiligi, operasıadan keıingi erte jáne alys kezeńderdegi pasıentterdiń ómir sapasy artady, kenetten qaıtys bolý, asqynýlar jáne t.b. sany azaıady.