2025 jylǵy 18 mamyrda Túrkistan oblysy, Otyrar aýdanynda Qazaqstan Respýblıkasy Mádenıet jáne aqparat mınıstrligi Mádenıet komıtetiniń «Otyrar» memlekettik arheologıalyq mýzeı-qoryǵy» RMQK respýblıkalyq memlekettik qazynalyq kásipornynyń uıymdastyrýymen jyl saıyn halyqaralyq deńgeıde ótkiziletin dástúrli «Mýzeı túni» aksıasy aıasynda «Otyrar: Ótkenge saıahat túni» taqyrybynda mádenı is-shara ótti.
Sharanyń saltanatty ashylýyna Otyrar aýdany ákiminiń orynbasary Qulmahanov Aıdos Qulmahanuly, aýdandyq máslıhattyń tóraǵasy Uzaqov Ýalıhan Jamalhanuly jáne «Otyrar» memlekettik arheologıalyq mýzeı-qoryǵy» RMQK dırektory Jandosov Aıbek Qystaýbaıuly qatysyp, shara qonaqtary men qatysýshylaryn quttyqtap, tarıhı qundylyqtardy nasıhattaýǵa baǵyttalǵan is-sharanyń mańyzdylyǵyn atap ótti.
Merekelik kesh barysynda mýzeı isine sińirgen eńbegi úshin mýzeı ardagerleri men qyzmetkerleri mýzeı basshylyǵynyń, «AMANAT» partıasynyń jáne aýdan ákiminiń atynan arnaıy marapattarmen jáne alǵys hattarmen marapattaldy. Bul qurmet – sala mamandarynyń mádenı muraǵa qosqan úlesin baǵalaý men olardyń eńbegine degen joǵary qurmettiń kórinisi boldy.
İs-sharanyń negizgi maqsaty – halyqtyń mýzeı isine qyzyǵýshylyǵyn arttyrý, tarıhı-mádenı muralardy keńinen nasıhattaý, sondaı-aq ulttyq rýh pen patrıottyq sana-sezimdi nyǵaıtý.
Mádenı kesh aıasynda kelesi baǵyttar boıynsha is-sharalar uıymdastyryldy:
Taqyryptyq kórmeler men ekskýrsıalar – kelýshilerdi kóne dáýirler tarıhymen tanystyryp, jádigerlerdiń tarıhı mánin keńinen ashty;
Tanymdyq vıktorınalar – jas urpaqtyń tarıhı bilimin arttyrýǵa jáne zıatkerlik áleýetin damytýǵa yqpal etti;
Derekti fılmder kórsetilimi – ulttyq bolmys pen tarıhı mura taqyrybyndaǵy tárbıelik máni zor fılmder usynyldy;
Ulttyq oıyndar men etnografıalyq kórinister – etnokeshen aýmaǵynda uıymdastyrylǵan altybaqan tebý, láńgi tebý, gir tasyn kóterý, qolkúres, urshyq ıirý sıaqty dástúrli oıyndar arqyly qazaq halqynyń mádenı qundylyqtary qaıta jańǵyrtyldy.
«Mýzeı túni» – bul bir kúndik mádenı is-shara ǵana emes, tarıh pen búginniń, ótken men keleshektiń arasyn jalǵaıtyn rýhanı altyn kópir qyzmetin atqardy.
Sharaǵa qatysýshylar ulttyq muraǵa degen qurmetin tereńdete túsip, týǵan jerge degen súıispenshilikti sezine otyryp, tarıhı tanymyn arttyrdy. Atalǵan kesh – jas urpaqtyń patrıottyq tárbıesin qalyptastyrýǵa jáne ulttyq sana-sezimin damytýǵa oń yqpal etti.
İs-sharanyń ótkizilgen kúni: 18 mamyr 2025 jyl
Ótkizilgen orny: Túrkistan oblysy, Otyrar aýdany, Jibek Joly kóshesi, 1-úı, «Otyrar» memlekettik arheologıalyq mýzeı-qoryǵy» RMQK
Uıymdastyrýshy: Qazaqstan Respýblıkasy Mádenıet jáne aqparat mınıstrligi, Mádenıet komıteti, «Otyrar» memlekettik arheologıalyq mýzeı-qoryǵy» RMQK