Almatyda profesor Rysbek Baımahanulyna arnalǵan halyqaralyq konferensıa ótti
Almatyda Qazaq ǵylymynyń kórnekti ókili, tehnıka ǵylymdarynyń doktory, profesor Rysbek Baımahanulyna arnalǵan halyqaralyq ǵylymı-praktıkalyq konferensıa joǵary deńgeıde ótti. Ǵalymnyń esimimen tyǵyz baılanysty – geomehanıka, sıfrlyq tehnologıalar jáne ınjenerlik ǵylymdar salasy búgin jańa tynys aldy.
QyzPU men Mehanıka jáne mashınataný ınstıtýty uıymdastyrǵan alqaly jıyn ǵylymdy ulyqtaǵan taǵylymdy shara ǵana emes, jas ǵalymdarǵa jol kórsetken baǵyt-baǵdar alańy boldy. «Geomehanıkalyq prosester jáne sıfrlandyrý: ınovasıalyq tehnologıalar jáne damý perspektıvalary» taqyrybyndaǵy konferensıada geomehanıka ǵylymynyń damýyndaǵy tyń ıdeıalar men profesor Baımahanulynyń ǵylymı mektebiniń muragerligi keńinen talqylandy.
Qazaq ulttyq qyzdar pedagogıkalyq ýnıversıtetiniń Basqarma Tóraǵasy – Rektory Gúlmıra Qanaıdyń aıtýynsha, profesor Baımahanuly – bir ǵana ǵylymnyń emes, ult rýhanıaty men ulttyq tárbıege de eńbek sińirgen qaıratker.
«Profesor Rysbek Baımahanuly – halyqaralyq deńgeıde moıyndalǵan kórnekti ǵalym. Ol Qyzdar ýnıversıtetinde 50 jylǵa jýyq ýaqyt boıy jemisti eńbek etip, ǵylym men bilim salasyna súbeli úles qosty. Geomehanıka salasy boıynsha halyqaralyq ISSMG qoǵamynyń tórt ǵylymı komıtetiniń múshesi retinde Japonıa, Kanada, Túrkıa, Qytaı syndy aldyńǵy qatarly memleketterde ǵylymı usynys-tarymen tanyldy. Ǵalymnyń 450-den astam ǵylymı eńbegi jaryq kórgen. Onyń ishinde 19 oqý quraly, 10 monografıasy bar. Sondaı-aq, Scopus derekter bazasynda – 9, Web of Science bazasynda – 2 maqalasy jarıalanyp, Hırsh ındeksi 6-ǵa jetken. Profesordyń jetekshiligimen 9 ǵylym kandıdaty, 1 ǵylym doktory jáne kóptegen magıstrler daıyndaldy. Ulttyq rýh pen tárbıege aıryqsha mán bergen Rysbek Baımahanulynyń ǵylymı-pedagogıkalyq murasy – jas urpaqqa úlgi, keıingi býynǵa baǵyt-baǵdar», – dedi rektor.
İs-sharaǵa akademıkter, profesorlar, jas zertteýshiler jáne ǵalymnyń týǵan-týystary qatysty. Seksıalyq otyrystarda 30-dan asa ǵylymı baıandama tyńdalyp, úzdik ǵylymı jumystar dıplommen marapattaldy.
Tehnıka ǵylymdarynyń doktory, profesor, Halyqaralyq kólik akademıasynyń jáne QR Ulttyq ınjenerlik akademıasynyń akademıgi Baǵdat Burhanbaıulynyń sózinshe, Rysbek Baımahanuly – metropolıten qurylysynyń qaýipsizdigi jóninde ǵylymı negizdeme jasaǵan alǵashqy qazaqstandyq ǵalymdardyń biri.
«Bul konferensıanyń óskeleń urpaqqa tárbıelik mańyzy óte zor. Almaty metrosynyń qajettiligi men tıimdiligin dáleldegen – osy kisiniń birneshe onjyldyqqa sozylǵan eńbegi. Ol metronyń jer ústindegi ǵımarattarǵa qaraǵanda qaýipsiz ekenin de kóp jyldar boıy ǵylymı turǵydan dáleldedi. Ómiri – erlik pen talmaı eńbektiń úlgisi. Ár alýan salada daryndylyǵyn kórsetti: jas kezinde áńgimeler, fantasıkalyq povester men kópshilikke arnalǵan ǵylymı kitaptar jazdy. Matematıka, fızıka, mehanıka, ásirese sandyq ádisterdi tereń meńgergen. Qysqasy, óskeleń urpaqqa ónege bolar tulǵa», – dedi ǵalym.
Konferensıa aıasynda profesordyń ómiri men ǵylymı joly jaıly beınebaıan kórsetilip, shákirtteri arnaý óleńderin oqydy. Ásirese jas zertteýshilerge arnalǵan «Úzdik jas ǵalym» marapattary – sharanyń erekshe sáti boldy.
Ǵalymnyń uly Aıdar Baımahan jas ǵalymdardy yntalandyrý maqsatynda jeke qarajatynan syıaqy taǵaıyndap, ǵylymdaǵy sabaqtastyqty qoldaıtynyn jetkizdi.
«Ákemniń ómirlik mısıasy – bilim men ǵylymdy biriktirý bolatyn. Ol 450-dan asa ǵylymı maqalanyń avtory. Tek ǵylymı maqalalar jazyp qana qoımaı, shákirt tárbıeleýdi paryz sanady. Ákemniń isi – bizge amanat», – dedi ol.
Bul konferensıa – qurmet pen ǵylymnyń úılesken sáti ǵana emes, bolashaq zertteýlerdiń bastaý kózine aınalatyn mańyzdy alań boldy. Rysbek Baımahanulynyń ǵylymı murasy áli de talaı býynǵa baǵyt bolary sózsiz.
QyzPU qabyrǵasynda ótken taǵylymdy jıyn – ǵylymǵa bas ıýdiń, ulaǵatty ustazdy eske alýdyń jáne ǵylym men rýhanıattyń ózara baılanysyn dáripteýdiń jarqyn úlgisi boldy.
