Polısıanyń 3 qyzmetkerine úkim shyqty, olar qarý men oq-dárilerdi urlady dep aıyptaldy, dep habarlaıdy aqshamnews.kz Bostandyq aýdandyq sotyna silteme jasap.
Almaty qalalyq polısıa departamentiniń qyzmetkerleri esepten shyǵarylǵan 50-ge jýyq qarýdy urlap, olardy zańsyz satqan.
Onyń ishinde Kalashnıkov avtomaty, myltyq, Makarov tapanshalary, granatalar men ártúrli kalıbrdegi oq-dáriler bolǵan.
Sot úkimine sáıkes, bul qylmystyq sqemaǵa Tyl basqarmasyna qarasty áskerı jáne arnaıy qamtamasyz etý bóliminiń aǵa ınspektory M.J., Polısıa departamentiniń krımınalısi M.Sh. jáne júrgizýshi N.A. qatysqan. Olar joıýǵa arnalǵan qarýdy júıeli túrde urlap, satqan dep tanyldy.
"Tergeý barysynda anyqtalǵandaı, Tyl basqarmasyna qarasty bólimniń aǵa ınspektory sot isteri boıynsha aıǵaq zat retinde saqtalǵan nemese tárkilengen atys qarýlaryn aldymen zańdy túrde esepten shyǵarǵan. Joıylýy tıis qarýlar shyn máninde urlanǵan. Qalǵan eki áriptesi (ekeýi de PD qyzmetkerleri) bul qarýlardyń zaýyttyq nómirlerin joıyp, boıap nemese ózgertip, satqan. Keıin polısıa qyzmetkeri olar joıyldy degen jalǵan aqparatty resmı tirkeýlerge engizip otyrǵan", - delingen sot habarlamasynda.
Bostandyq aýdandyq sotynyń úkimimen 3 aıyptalýshy da júıeli túrde qarý urlap, satý isi boıynsha kináli dep tanyldy. Sqemanyń uıymdastyrýshysy - Polısıa departamentiniń aǵa ınspektory M.J. 8 jylǵa, krımınalıs - 5,5 jylǵa, júrgizýshi - 7 jylǵa bas bostandyǵynan aıyryldy.
"Qyzmettik ókilettikterin paıdalanyp, olar birneshe márte aldyn ala sóz baılasý arqyly atys qarýy men oq-dárilerdi urlaǵan. Bul qarýlar aıǵaq zat retinde arnaıy qoımaǵa tapsyrylǵan. Olar bul qarýlardy zańsyz aınalymǵa shyǵarǵan, qoǵamdyq qaýipsizdik pen tártipke qarsy áreketter jasaǵan, sondaı-aq memlekettik qyzmet pen basqarý múddesine qarsy aýyr qylmystar jasaǵan", – delingen sot úkiminde.
Polıseıler arnaıy shenderinen aıyrylyp, ekeýine memlekettik qyzmette ómir boıy jumys isteýge tyıym salyndy.