Ótken jyly Almaty mýzeılerin tamashalaýǵa shamamen 310 myń adam kelgen

Al bıletter satylymynan 85,5 mln teńge tabys tústi. Bul - qala turǵyndary men qonaqtarynyń mádenı muraǵa degen qyzyǵýshylyǵy artqanyn, mýzeılerdiń qyzmet kórsetý sapasy jaqsarǵanyn dáleldeıtin rekordtyq kórsetkish, dep habarlaıdy aqshamnews.kz

2024 jyldan beri oqýshylar qalalyq mýzeılerge tegin kiretinin erekshe atap ótkim keledi. Bul múmkindikti ata-analar ǵana emes, muǵalimder de tıimdi paıdalanyp, balalardy ekskýrsıalarǵa aparyp júr. Byltyr 85 myń oqýshy tarıhı jádigerler men óner týyndylaryn gıdterdiń jetekshiligimen zerttep, tanysty. Olar osy múmkindik arqyly mádenıet pen ónerdi, tarıhty tereń túsine bastaıdy. Balalaryńyzben birge mýzeılerge barýdy ádetke aınaldyryńyzdar.

Qala ákimi Erbolat Asqarbekuly mýzeı isiniń jáne mýzeı qyzmetkerleriniń jan-jaqty damýyna úlken nazar aýdaryp, qoldaý kórsetip keledi.

Bizdiń mamandar álemniń úzdik mádenı oshaqtarynda kásibı daǵdylaryn jetildirip, bilim alyp jatyr. Oqyp-úırengenin qala mýzeılerinde engizip, qyzmet kórsetý sapasyn arttyrý úshin aıanbaı eńbek etýde. Ákimdik bastamasymen qyzmetkerlerdiń aılyǵy 30%-ǵa ósip, sońǵy birneshe jylda 30 maman baspanaly boldy.

Byltyr áriptesterimiz 80-nen astam kórme ótkizdi, júzdegen mádenı is-shara uıymdastyryp, mádenı astanamyzdyń damýyna atsalysyp júr.

Bıyl birneshe mýzeı qurylysy boıynsha qujattamalar ázirlenedi. Odan bólek, Almaty aýmaǵynda saqtalǵan erte temir ǵasyrynyń jalǵyz eskertkishi – Boraldaı saq qorǵandaryn geoskanerleý jumystary boıynsha aýqymdy jumys atqaryp jatyrmyz. Jýyrda mýzeı isin damytý boıynsha jaqsy jańalyqtarmen bólisetin bolamyz.