Jasóspirimderge otbasynda jáne oqý ordasynda úılesimdi damýǵa qalaı kómektesýge bolady? Qaqtyǵystardyń aldyn alý úshin ne isteý qajet? Osy ózekti máseleler 2025 jylǵy 15 qyrkúıekte Almaty memlekettik bıznes-kolledjinde talqylandy
Almaty elimizdiń bilim berý úderisinde kóshbasshy bolyp qala beredi. Qaladaǵy 88 kolejde 85 myńnan astam stýdent bilim alady. Árbir jas mamannyń kásibı daǵdylarymen qatar, ońtústik astanada emosıonaldy ıntellektini damytýǵa aıryqsha kóńil bólinedi.
«Ótpeli kezeńdi jastar kóbine stýdenttik jyldarda bastan ótkeredi. Bul kezeńde árkim óz emosıasyn túsinip, basqara almaıdy, ózge adamnyń sezimin seziný de ońaı emes. Sondyqtan ózin-ózi taný, ózin-ózi retteý, empatıa jáne qarym-qatynasty basqarý qabiletteri – tulǵalyq qalyptasýdaǵy basty kezeń», – dep atap ótti Almaty memlekettik bıznes kolejiniń dırektory Aınur Mýkajanova.
Qalalyq ádistemelik saǵatta «Pedagogter men ata-analar: qaqtyǵystardyń aldyn alý» taqyrybynda megapolıstegi kolejderdiń tárbıe isi jónindegi dırektor orynbasarlary men ata-analar komıtetiniń ókilderi bilim berý júıesiniń jańa syn-tegeýrinderin talqylady. Sıfrlandyrý, qundylyqtardyń ózgerýi jáne áleýmettik qaýipterdiń artýy jaǵdaıynda otbasy men oqý oryndarynyń dıalogy aıryqsha mańyzǵa ıe bolýda.
İs-sharaǵa qatysýshylardyń aıtýynsha, tek birlesken kúsh-jiger arqyly ǵana qaqtyǵystardyń aldyn alyp, jasóspirimderdiń úılesimdi damýyna jaǵdaı jasaýǵa bolady.
Bul sharanyń Otbasy kúnimen tuspa-tus kelýi de sımvoldyq mánge ıe. Ol «Adal azamat» biryńǵaı tárbıe baǵdarlamasy aıasynda ótkizildi. Baǵdarlama jastardy adaldyqqa, jaýapkershilikke jáne otbasylyq qundylyqtarǵa qurmetpen qaraýǵa baýlýdy maqsat etedi. Sonymen qatar, 2025 jyl Qazaqstanda Jumysshy mamandyqtar jyly dep jarıalanǵandyqtan, tárbıe jumysy stýdentterdiń eńbek pen bolashaq mamandyǵyna sanaly kózqarasyn qalyptastyrýǵa baǵyttalýy tıis ekendigine nazar aýdaryldy.
Kezdesýde jetekshi mamandar – Almaty qalasy Bilim basqarmasynyń Psıhologıalyq qoldaý ortalyǵynyń ádistemelik jumys bóliminiń basshysy Ásem Jumanova, «Jan-Saıa» daǵdarys ortalyǵynyń dırektory, «Krızıstik ortalyqtar odaǵy» ZTB tóraıymy Zúlfıa Baısaqova, Almaty qalasy «Otbasyn qoldaý ortalyǵy» KMM psıhology Svetlana Pak jáne basqa da sarapshylar sóz sóıledi. Olardyń qatysýy otbasyn nyǵaıtý taqyrybynyń ózektiligin kórsetip, is-sharanyń mańyzyn arttyrdy.
Qurmetti qonaqtar qatarynda Almaty qalasy ákimi janyndaǵy Áıelder isteri jáne otbasylyq-demografıalyq saıasat jónindegi komısıa músheleri de boldy. Bul olardyń qatysýy otbasy ınstıtýtyn nyǵaıtý men qaqtyǵystardyń aldyn alý taqyryby tek bilim berý júıesimen shektelmeı, mádenıet, áleýmettik qoldaý jáne genderlik damý salasy sarapshylaryn keńinen tartýdy talap etetinin aıqyndady.
Baǵdarlamanyń mańyzdy bóligi «Face2Face» teatrynyń «Túsin meni» atty shaǵyn qoıylymy boldy. Onda balany ýaqytyly túsinip, qoldaýdyń qanshalyqty mańyzdy ekeni kórkem túrde kórsetildi. Keıin pedagogter men ata-analar toptarǵa bólinip, naqty jaǵdaılardy taldap, qaqtyǵystardy sheshýdiń konstrýktıvti joldaryn usyndy. Mundaı format sharany jandandyryp qana qoımaı, bilimdi tájirıbe júzinde qoldanýǵa múmkindik berdi.
Ádistemelik saǵat tájirıbe almasý men naqty usynystar ázirleý alańyna aınaldy. Qatysýshylar alǵash ret qala deńgeıinde pedagogter men ata-analar bir ústel basynda bas qosqan mundaı sharanyń mańyzdylyǵyn erekshe atap ótti. Bul tájirıbeni jalǵastyrýdyń qajettiligi basa kórsetildi. Kezdesýdiń basty túıini – jasóspirimderdiń úılesimdi damýy úshin pedagogter men ata-analardyń senimdi yntymaqtastyǵy qajet.
«Bereke basy – birlik» – deıdi qazaqtyń dana maqaly. Bul qaǵıda búkil sharanyń basty ustanymyna aınaldy: otbasy men kolejdiń birligi – adal ári jaýapty qazaqstandyq azamatty tárbıeleýdiń kepili.