Almaty ákímí Darhan Satybaldy Qazaqstandaǵy Úndístan Respublıkasynyń Tótenshe jáne Ókílettí Elshísí Saılas Tangalmen kezdestí. Taraptar sauda-ekonomıkalyq, ınvestıtsıyalyq jáne turıstík salalardaǵy ekíjaqty yntymaqtastyqty keńeıtu jobalaryn talqylady.
2025 jyly qańtar-mausym aılarynda Qazaqstan men Úndístan arasyndaǵy tauar aınalymy 547 mln AQSh dollarynan asty, onyń íshínde 183 mln dollary Almatyǵa tıesílí. Būǵan qosa, atalǵan kezeńde qalaǵa Úndístannan 56 myńnan astam turıst keldí, būl ótken jylmen salystyrǵanda 16% kóp.
Darhan Satybaldy Almatyny elímízdíń mádenı, ǵylymı, ískerlík jáne qarjylyq ortalyǵy ekenín atap óttí. Qazaqstan Respublıkasynyń jalpy óńírlík ónímíníń besten bír bólígí – Almatyda.
Jan basyna shaqqandaǵy jalpy óńírlík óním 27 myń AQSh dollaryna teń, al boljam boıynsha 2025 jyldyń qorytyndysy boıynsha ekonomıkalyq ósím 6,4% deńgeıínde bolmaq.
Qala ákímí megapolıstíń ınvestıtsıyalyq tartymdylyǵyna erekshe toqtaldy. 2024 jyly Almatyǵa shamamen 5,7 mlrd dollar kólemínde ınvestıtsıya tartyldy, būl ótken jylmen salystyrǵanda 8,2% artyq. Onyń shamamen 90%-y jeke ınvestıtsıya. Búgínde qalada úndí kapıtaly tartylǵan 258 kásíporyn jūmys ísteıdí.
Turıstík baılanysty damytuǵa da aıryqsha kóńíl bólíndí. Tíkeleı áue qatynasyn keńeıtu úlken ról atqaryp keledí. Almatydan Delı men Mumbaıǵa tūraqty reıster, sondaı-aq Goaǵa mausymdyq reıster ashylǵan.
Kezdesu qorytyndysy boıynsha Almaty ákímí seríktestíktíń bolashaǵy zor baǵyttary retínde IT-sektordy, farmatsevtıkany, óńdeushí ónerkásíptí jáne jańa tehnologıyany atady.
«Qazaqstan men Úndístan arasyndaǵy qarym-qatynastar barlyq baǵytta damı beredí, būl ekí halyqtyń bauyrlastyq baılanysyn nyǵaıtady dep senemín. Kezdesu úshín alǵys bíldíremín jáne odan árí jemístí yntymaqtastyqqa úmít artamyn», – dedí Darhan Satybaldy.
Aıta keteıík, 2025 jyly Qazaqstan men Úndístan arasynda dıplomatıyalyq qatynas ornaǵanyna 33 jyl toldy.