Qazaqstandyq ǵalymdar oılap tapqan biregeı ázirlemesi keń taralǵan aýrýlardan bolatyn ólim-jitim men múgedektikti tómendetýge múmkindik beredi.
Jergilikti ónertabys tamyrlardyń ótimdiligin qalpyna keltirýge múmkindik beredi. Búginde ǵylymı ortalyqtyń qyzmetkerleri qazaqstandyq jáne Eýrazıalyq salalyq vedomstvonyń patentterin aldy, dep habarlaıdy Almaty-akshamy.kz Qazaqtv.com saıtyna silteme jasap.
"Biz jasaǵan qurylǵy qan tamyryndaǵy aterosklerotıkalyq túıinshekterdi túbegeıli alyp tastaýǵa múmkindik beredi. Qarapaıym tilmen aıtqanda, arterıany tazartady. Qurylǵyny tamyrǵa bir engizgende birden birneshe arterıany tazalaýǵa bolady. Ekinshiden, túıirshek túzilýiniń aldyn alý maqsatynda bir-eki jyldan keıin taǵy bir qaıtalaýǵa bolady. Bul operasıany birneshe márte qaıtalap jasaýǵa bolady. Tek stent ornatý kezinde jasaýǵa ruqsat etilmeıdi. Arterıaǵa stent ornatsa, ol ómir boıy qalyp qoıady. Keıin kóptegen asqynýlarǵa alyp keletinin bilemiz", - deıdi tamyr patologıasy ortalyǵynyń dırektory Oralbaı Dármenov.
Otandyq ónertabys qoldanysqa engizilse, keleshekte tamyrlardy stentteý, sondaı-aq júrek, mı, aıaqtaǵy kúretamyrlarǵa kúrdeli operasıalardan bas tartýǵa bolady. Emniń bul túri jeńilirek ótedi, nátıjesi de jaqsy.
"Bizdiń qurylǵymyz – álemdik jańalyq. Bolashaqta ol stentteý jáne shýnttaý ádisterin qoldanystan shyǵarýǵa yqpal etedi dep oılaımyz. Bul ádisti qan tamyrlarynyń aterosklerotıkalyq zaqymdanýy bar adamdar qoldana alady. Ateroskleroz aýrýy qazir jıi kezdesedi. 40 jastaǵylardyń arasynda árbir tórtinshi adamda, 60 jastaǵylardyń arasynda árbir ekinshi adamda osy aýrý anyqtalady", - deıdi tamyr patologıa ortalyǵynyń dırektory Oralbaı Dármenov.
Jańasha emdeý prosedýrasy qazaqstandyqtar úshin asa qymbatqa túspeıdi. Uqsas ádisterge qaraǵanda onyń quny áldeqaıda tómen. Qazir qurylǵynyń zerthanalyq jáne ónerkásiptik úlgileri daıyndalý ústinde. Bul klınıkalyq zertteýler júrgizip, komersıalyq óndiristi jolǵa qoıý úshin qajet.