Qazaqstandyqtar Qasym-Jomart Toqaevtyń Parlament Májilisiniń otyrysynda sóılegen sózin qyzý talqylap jatyr
Óz kezeginde sarapshylar Memleket basshysy usynǵan reformalardyń áleýmettik aspektin atap ótti, dep habarlaıdy Almaty-akshamy.kz
«Qazaqstan halqyn qoldaý qory» elimizdegi ótkir áleýmettik máselelerdi sheshýdiń tıimdi tetigi retinde mańyzy jaǵynan biregeı jobaǵa aınalýy tıis. Buǵan qajettilik burynnan pisip-jetilgen edi. «Al Memleket basshysynyń sheshimi ýaqytyly qabyldanyp otyr», – deıdi Zańnama jáne quqyqtyq aqparat ınstıtýtynyń dırektory Ramazan Sárpekov.
«Qazaqstanda qanshama qor bar, biraq bul qor halyqpen, stýdenttermen, áleýmettiń osal tobyndaǵy adamdarmen tikeleı jumys isteýi kerek. Emdelýge de jumsalý kerek. Nesin jasyraıyq? Keıde óte qıyn jaǵdaılar týyndaıdy. Halyq Densaýlyq saqtaý mınıstrligine júginip jatady nemese ózge mekemelerge sabylady. Al sońynda ýaqyt bosqa ketedi. Osyndaı máseleler negizinde is-qımyl baǵdarlamalary belgilenedi, basqa da saıası organdar tartylady dep oılaımyn. Sonymen qatar jaǵdaı jaqsarady dep úmittenemin», - deıdi QR Zańnama jáne quqyqtyq aqparat ınstıtýtynyń dırektory Ramazan Sárpekov.
Sonymen qatar Prezıdent áleýmettik jaýapkershilikti arttyrý memleket pen halyq arasyndaǵy teń dıalog arqyly múmkin bolatynyn birneshe ret atap ótken edi. Jaqynda Memleket basshysy barlyq joǵary laýazymdy tulǵalarǵa óńirlerge jıi shyǵýdy tapsyrdy. Bastamany azamattyq sektor da qoldady.
«Qazir halyqpen keri baılanys ornatý qajet. Olarmen tikeleı kezdesip, áńgimelesip, memlekettik saıasatty, onyń baǵyt-baǵdar vektoryn, memleket qaı jaqqa baǵyt alyp jatqanyn qarapaıym, túsinikti tilde halyqqa jetkizý kerek. Áleýmettik seriktestik – bul óte mańyzdy dıalog alańdaryn qalyptastyrý qajet ámbebap alań», - deıdi Nur-Sultan qalalyq «Kásipodaqtar ortalyǵy» fılıalynyń jetekshisi Tólegen Qunadilov.