Bul senator Bıbigúl Jeksenbaıdyń sózi.
Senator búgin kórermen jat eldiń ıdeologıasyn sanasyna sińirip jatyr degen másele kóterdi, dep habarlaıdy Almaty-akshamy.kz
Bıbigúl Jeksenbaı bul týraly Álıhan Smaıylovqa joldaǵan depýtattyq saýalynda aıtty.
"Bıyl naýryz aıynda qabyldanǵan aqparattyq doktrınada "televızıa men radıo aýdıtorıasy eń aýqymdy, eń yqpaldy aqparat kózderiniń biri bolyp qala beredi, otandyq tele jáne radıostansıalarǵa tıisti kóńil bólingen jaǵdaıda olardyń sheteldik medıa alpaýyttarymen básekege túsýge múmkindik beretindeı áleýeti bar" delingen. Qazaqstanda tirkelgen 83 teleradıokompanıanyń 21-i respýblıkalyq deńgeıde habar taratady. Onyń tek 15-i mýltıplekske tegin enip, habar taratyp otyr. Al, qazaqstandyq kórermenderge usynylǵan sheteldik telearnalar sany 300-ge jýyqtady. Jasyratyny joq, qazirgi tańda syrttan aǵylǵan aqparattyq-nasıhattyq ıneksıalardyń kúsheıýi nazar aýdartady. Ásirese shekaralyq aımaqtardyń turǵyndary úshin sheteldik aqparat kózi úırenshikti bolǵan", - dedi Senat depýtaty.
Sózinshe, Qazaqstanda sıfrlyq-efırlik teledıdarǵa kóshý 2015 jylǵa deıin josparlanǵanymen, bul jumystar sozylyp ketken.
"Sıfrlyq-efırlik teledıdarǵa kóshsek, respýblıkalyq mańyzy bar qalalar men oblys ortalyqtarynda 30 arnaǵa deıin, al oblys ortalyqtarynan shalǵaı eldimekenderde 15 arnaǵa deıin telearnalardy translásıalaýǵa múmkindik paıda bolyp, ekinshi-úshinshi mýltıpleks qosylyp, otandyq telearnalardyń damýyna zor múmkindik ashylady degen ýáde bolǵan. Alaıda, ázirge memlekettik arnalardan basqalary úshin mýltıplekste habar taratý arman bolyp otyr. Óńirlik, ásirese shekaralyq aýmaqtaǵy jekemenshik telearnalar odan ári oryn ala almaıdy. Sebebi baǵasy ýdaı qymbat. Iaǵnı jekemenshik arnalardyń damýyna, otandyq kontenttiń kóbeıýine ózimiz kedergi jasap otyrmyz", - dedi ol.
Bıbigúl Jeksenbaı respýblıkalyq telearnalarǵa balama izdegen kórermenniń Qazaqstanmen shekaralas elderdiń telearnalaryna telmirip, jat eldiń ıdeologıasyn sanasyna sińirip jatqanyn basa aıtty.
"Bir ókinishtisi, OTAU TV arqyly otandyq telearnalarymyz ózge elge habar taratýyna shekteý bolǵanymen, táýelsizdik alǵan jyldary biz alys-jaqyn shet elderdiń buqaralyq aqparat quraldarynyń Qazaqstan aýmaǵyna taralýyna keń múmkindik jasadyq. Qazir sıfrlyq efırlik teledıdar Qazaqstan halqynyń 92,66 paıyzyna qoljetimdi. Elimiz sıfrlyq habar taratýǵa kóshkenimen, óńirlerdegi jekemenshik telearnalar burynǵy beıshara kúıinde qalyp otyr. Aqparat taratatyn telearna damymasa, ıdeologıa da bolmaıdy. Ideologıa degenimiz tek Astana, Almatyda ǵana emes, kúlli óńirlerde júrgizilýi tıis", - dep atap ótti spıker.
Bıbigúl Jeksenbaı Qazaqstannyń qorǵanys salasyna qyrýar qarajat bóletinin, alaıda qorǵanysqa qansha qarajat bólsek te, onyń tıimdiligi tómen ekenin aıtyp otyr.
Osy máselege qatysty depýtat birqatar usynys aıtty.
"Úkimetke óńirlik, ásirese shekaralyq aýmaqtarda aqparattyq qaýipsizdik kúsheıtip, jergilikti otandyq kontentti kóbeıtý úshin óńirlerdegi jeke telearnalar ógeıdiń kúıin keshpeı, básekelestik kúreste kúsh-qýatyn arttyrýyna jan-jaqty qoldaýdy qarastyrý qajet. Mýltıplekske shekaralyq aımaqtardaǵy jeke menshik telearnalardyń da qosylýyna jaǵdaı jasap, baǵa saıasatyn retteýge kóńil bólingen jón. Shekaralas elderdegi qandastarymyzdyń Qazaqstan habarlaryn kórýge spýtnıktik taralý múmkindigin keńeıtýdi qarastyrý kerek", - dep atap ótti Senat depýtaty Bıbigúl Jeksenbaı.