Jergilikti dýblerlar Bollıvýdtaǵy aýqymdy jobanyń túsirilimine atsalysýǵa nıetti
Qazir olar jasandy qoıylymdar toptamasyn daıyndaý ústinde. Joba tapsyrys berýshi tarapynan maquldansa, keler jyldan túsirilim jumystary bastalmaq, dep habarlaıdy Almaty-akshamy.kz
Ondaǵy kúrdeli ári áserli kórinisterge 5 qazaqstandyq jáne 30 úndistandyq kaskader qatysady dep kelisilgen.
«Bul joly men ekshn dırektor retinde shaqyrtý aldym. Iaǵnı ózimniń komandammen, operatorlar tobymmen ekshn kórinisterdi bastan-aıaq túsirýdi senip tapsyryp otyr. Bul bizge berilgen úlken baǵa dep bilemin. Bul – asa aýqymdy ári kúrdeli joba. Kıno Úndistan men Pákistan arasynda bolǵan soǵys ýaqytynda áke men bala oqıǵasyn baıandaıdy. Onda mahabbat bar, degenmen jelisi negizinen shytyrmanǵa toly. Sújette ákesi ulyn urystardan aýlaq ustaýǵa tyrysyp, jany qalmaı alysady», - deıdi Nomad Stunts halyqaralyq kaskaderler tobynyń jetekshisi Jaıdarbek Kúnǵojınov.
Nomad Stunts tobynyń quramynda qazaqstandyqtardan basqa Qyrǵyzstan, Ázirbaıjan, Túrkıa, Reseı, Ýkraına, Bolgarıa, Germanıa jáne Avstrıa elderiniń kásipqoı mamandary bar. Halyqaralyq quram «Toqtaýsyzdar-2», «Ronın», «Jabaıy Konan», «Mońǵol», «Mýlan», «Kóshpendiler» jáne «Tomırıs» syndy fılmderdegi jumystarymen keńinen tanyldy. Olardyń oryndaýyndaǵy erekshe ekshn qoıylymdar álemdik kıno óndirisi maıtalmandary men synshylary tarapynan joǵary baǵaǵa ıe bolyp júr. Jaqynda top múshesi Álıa Ysqaqova Kanadanyń bedeldi kıno jáne telearna akademıasynyń arnaıy júldesin jeńip aldy.
«Ol Kanadada jumys istep júrgende «Kýng-fý» atty serıal keıipkerine dýbler bolý usynysy túsken. Onyń jumysy laıyqty baǵalandy. Osydan eki apta buryn «Úzdik trúkter» jáne «Úzdik kaskader» atalymdary boıynsha synǵa túsip, marapatqa ıe boldy», - deıdi Nomad Stunts halyqaralyq kaskaderler tobynyń jetekshisi Jaıdarbek Kúnǵojınov.
Jahandyq deńgeıde keńge tanylǵan blokbasterlerde erekshe ónerleri jáne minsiz jumystary men álemdi moıyndatqan qazaqstandyq ekshn sheberlerine iri sheteldik kınokompanıalardan jáne ataqty rejıserler tarapynan yntymaqtastyq jóninde usynystar jıi túsedi. Máselen, kelesi jyly golıvýdtyq jobaǵa qatysý josparlanǵan. Kaskaderler tarıhı, zamanaýı kıno týyndylardyń kúrdeli qoıylymdarynda akterlerge dýbler bolyp, kóriniske áser qosyp, jandandyra túsedi.