Búdjetten qarjylandyrylatyn aýqymdy jobalardy, eń aldymen otandyq kásipkerler júzege asyrýy tıis. Bul týraly VIII saılanǵan QR Parlamentiniń birinshi sesıasynyń otyrysynda Memleket basshysy Qasym-Jomart Toqaev málim etti, dep habarlaıdy Almaty-akshamy.kz.
«Biz naqty ındýstrıalandyrýǵa, jergilikti óndiristi damytýǵa, ınfraqurylymdy jańǵyrtýǵa basa nazar aýdarýymyz qajet. Búdjetten qarjylandyrylatyn aýqymdy jobalardy, eń aldymen otandyq kásipkerler júzege asyrýǵa tıis», - dedi Qasym-Jomart Toqaev.
Prezıdent aldaǵy besjyldyq shaǵyn jáne orta bıznesti qoldaýǵa arnalýy kerek ekenin aıtty.
«Ulttyq jobalar ýaqtyly jáne sapaly júzege asyrylýǵa tıis. Búdjettiń árbir tıyny tıimdi jumsalýy kerek. Osynyń bárine parlamenttik baqylaý jasaý aıryqsha mańyzdy. Ózderińizge daýys bergen azamattar úlken úmit kútip, senim artyp otyr. Depýtattar bılik pen qoǵamnyń áriptestigin nyǵaıtýǵa úles qosýy qajet. Bul jumys «Halyq únine qulaq asatyn memleket» tujyrymdamasyn ornyqtyrýǵa septigin tıgizedi. Ásirese, saılaýda jeńiske jetken Amanat partıasy osy jumysqa belsene atsalysady dep senemin. Partıanyń tájirıbesi mol, qoǵam tarapynan jan-jaqty qoldaý bar. Sondyqtan, Amanat partıasy aldaǵy ózgeristerdiń bel ortasynda bolady dep úmittenemin», - dedi Memleket basshysy.