Ushý apparaty 700 metr bıiktikke kóterildi
Otandyq ushqyshsyz basqarylatyn ushý apparattary synaqtan ótti, dep habarlaıdy Almaty-akshamy.kz «Habar 24» telearnasyna silteme jasap.
Drondar júk te tasymaldaı alady. Olardyń bar ereksheligi – qurastyrý formasynda. Bul tikushaq tıpti ushqyshsyz basqarylatyn apparattyń alǵashqy synaǵy. Qurastyrýshylardyń maqsaty otandyq óndiristen shyqqan dronnyń múmkindikterin kórsetý. Aıtýlarynsha, ony qazirdiń ózinde júk tasymaly úshin qoldanýǵa bolady. Temir qus 7 kelige deıin zat tasymaldaı alady. Al búgin ushý apparaty 700 metr bıiktikke kóterilip, Kaspıı teńiziniń ásem kórinisterin taspaǵa basty.
«Máselen, teńizdegi munaradan jaǵalaýǵa deıingi qashyqtyq 15-20 shaqyrym. Tapsyrys berýshi flesh-kartany jetkizý úshin keme nemese tikushaq jaldaýy qajet. Árıne onyń shyǵyny kóp jáne kóbine qaýipsiz de emes. Al bizdiń ushqyshsyz basqarylatyn apparatymyz ol jumysty esh qıyndyqsyz oryndaı alady. Kvadrkopter bolsa 15-20 shaqyrym qashyqtyqqa dálme-dál usha almaıdy»,- deıdi kompanıanyń bas dırektory Ardaq Bektasov.
Qurastyrýshylar komandasy drondy kez kelgen iske tózimdiligi úshin zor maqtanyshpen «İlbis» dep ataıdy. Onyń negizgi mısıasy taýly, ormandy alqap sekildi adam jetýi qıyn aýdandarda qyzmet etý.
Ushý apparaty úsh kezeńmen qurastyrylady. Aldymen sýreti beınelenip, qurylymy egjeı-tegjeıli ázirlenedi. Aerodınamıkalyq múmkindikteri men ushý massasyn da eskerý qajet. 3D prınterde sulbasy daıyn bolǵan soń ınjener-qurastyrýshylar ár bólshegin jasap shyǵarady.
«Biz tehnologıalyq proses barysynda qajetti beriktik, jeńildik jáne ózge de ólshemderdi belgilep alamyz. Keıin bul matany matrısaǵa ornalastyryp, arnaıy shaıyrǵa malyp, vakýmdaımyz. Ony boıap árlegen soń tikushaqtyń bir bóligi daıyn bolady»,-dedi bas ınjener-qurastyrýshy Vıtalıı Groo.
Bul drondar mınýs 30-dan plús 45 gradýsqa deıingi temperatýrada usha alady. Kompanıanyń ónimderi negizinen jekelegen seriktesterge baǵyttalady. Ushý apparattaryn jóndeý men tehnıkalyq qyzmet kórsetý baǵytyn da belsendi damytýda. Osylaısha ishki naryqty sapaly ónimmen qamtýdy kózdeıdi.